भांगरभूंय | प्रतिनिधी
भारताच्या अ पंगडान पयली इमर्जिंग आशिया करंड सर्त जिखली. भारतान हॉंगकॉंगांत जाल्ले फायनलींत बांगलादेश अ पंगडाक 31 धांवड्यांनी हारयलो. भारताची ऑफ स्पिनर श्रेयांका पाटिलान चार विकेटी घेतल्यो.
भारतान पयलीं बॅटींग करतना 7 विकेटी वगडावन 127 धांवड्यो केल्यो. ताका जाप दितना बांगलादेशाचो डाव 96 धांवड्यांचेर सोंपलो.
टॉस जिखून पयलीं बॅटिंग करपाचो निर्णय घेवपी भारताक मुखेली श्वेता सेहरावत आनी उमा छेत्री हांकां बरी सुरवात करून दिवपाक जमली ना. हे जोडयेन फकत 28 धांवड्यांची भर घाली. उपरांत कनिका अहुजाच्या 30 आनी वृंदा दिनेश हाच्या 36 धांवड्यां नेटार पंगडाक 20 ओव्हरींनी 127 मेरेन मारप शक्य जालें.
बांगलादेशा वतीन सुलताना खातून आनी नाहिदा अख्तर हिणें दरेकी 2 विकेटी घेतल्यो.
मोखीचो फाटलाव करपी बांगलादेशाक लेगीत बरी बॅटींग करपाक जमली ना. ताका 19.2 ओव्हरींनी सगल्यो विकेटी वगडावन फकत 96 मेरेन मजल मारप शक्य जालें.
भारताच्या जैतांत श्रेयंका पाटील पर्जळ्ळी. तिणें चार ओव्हरींनी 13 धांवड्यो दिवन चार विकेटी घेतल्यो. तिचे खेरीत मन्नत कश्यपान 3 आनी कनिका आहुजान 2 विकेटी घेतल्यो.
सेमी फायनलींत भारताची मॅच श्रीलंके आड जावपाची आशिल्ली. पूण, पावसाक लागून मॅच जाली ना आनी गुणतकट्यांत पयली सुवात मेळयत भारतान फायनलींत सुवात मेळयली. दुसरे वटेन बांगलादेशान पाकिस्तानाक 6 धांवड्यांनी हारोवन फायनलींतली सुवात निश्चीत केल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
