भारताच्या जैतांत छेत्री पर्जळ्ळो

भांगरभूंय | प्रतिनिधी

भारतान सॅफ वस्तादपण सर्तींत पाकिस्तानाक 4-0 अशा गोल फरकांनी हारोवन सर्तीक उत्कृश्ट सुरवात केली. हांगाच्या श्री कांतीरावा स्टेडियमाचेर जाल्ले मॅचींत भारताचो मुखेली सुनील छेत्री पर्जळ्ळो. ताणें हॅट्रीक केली.

सुनील छेत्री खेरीत उदांता सिंगान एक गोल केलो. छेत्रीन तिनांतले दोन गोल पॅनल्टीचेर केले. छेत्रीन पयलो गोल 10व्या मिनटाक केलो. उपरांत दुसरो गोल 16व्या मिनटाक करून भारताक 2-0 अशी आघाडी मेळोवन दिली. मध्यांतरा मेरेन भारतान ही आघाडी कायम राखली. दुसऱ्या अर्दांत भारतान आक्रमक खेळ केलो. 74व्या मिनटाक छेत्रीन गोल करून आपली हॅट्रीक पुर्ण केली. हे हॅट्रिके उपरांत ताचे 90 आंतरराष्ट्रीय गोल जाले. आंतरराष्ट्रीय मळाचेर सगल्यांत चड गोल करपाचे वळेरेंत चवथे सुवातेर पावलो. मॅचींतलो चवथो गोल 81व्या मिनटाक उदांता सिंगान केलो.

मजगतीं, 45व्या मिनटाक भारताच्या प्रशिक्षकाची लडाय पाकिस्तानी खेळगड्या आड जाली. पाकिस्तानाचो खेळगडो थ्रो इन करतालो, त्या वेळार भारताचो प्रशिक्षक इगोर स्टिमॅकान बॉलाचेर हात मारलो. ते उपरांत पाकिस्तानाचे खेळगड्यांनी येवन स्टिमॅका कडेन बाचाबाची केली. ते उपरांत भारताचेय खेळगडे आयले आनी खूब वगत धक्का मुक्की जाली.

प्रकरण शांत जाल्या उपरांत मॅच रॅफ्रीन भारताच्या प्रशिक्षका रॅड कार्ड दाखयलें आनी पाकिस्तानाच्या प्रशिक्षकाक यॅल्लो कार्ड दाखयलें. ते उपरांत भारताचो डिफॅण्डर संदेश झिंगन आनी पाकिस्तानाचो मिडफिल्डर राहिस नबी हांकां यॅल्लो कार्ड दाखयलें.

मजगतीं, सुनील छेत्री कडेन पयल्याच अर्दांत हॅट्रीक पुर्ण करपाची संद आशिल्ली. 30व्या मिनटाक पाकिस्तानाच्या खेळगड्यान बॉक्सा कडेन फावल केलें. मोहम्मद उमर हयाद हाका यॅल्लो कार्ड आनी भारताक फ्रीक कीक मेळ्ळी. छेत्रीन कीक मारली. पूण, बॉल गोलपोस्टा भायल्यान गेलो.

सध्या भारत फॉर्मांत आसा. कांय दिसां पयलीं इंटरकॉण्टिनॅण्टल करंड जिखिल्लो. 18 जूनाक जाल्ले फायनलींत ताणें लेबनानाक 2-0 असो हारयलो. भारतान सर्तींत एक लेगीत मॅच हारूंक नाशिल्लो.

मजगतीं, भारत आनी पाकिस्तान ह्या पंगडां मदीं अजून मेरेन 26 मॅची जाल्यात. हातूंतल्यो 13 मॅची भारतान जिखल्यात. जाल्यार 10 मॅची बादाबाद उरल्यात. पाकिस्तानाक फकत तीन मॅचींनी जैत फावो जालां. सॅफ वस्तादपण सर्तींत भारतान आठ मॅची जिखल्यात.