भांगरभूंय | प्रतिनिधी
रोशन पैगीणकार: दाबें सरकारी माध्यमीक विद्यालयांत गोंय मुक्ती दीस उमेदीन
वाळपय: गोंयचे मुक्तीचो इतिहास विद्यार्थ्यां मेरेन पावप खूब गरजेचें. आमच्या सुटके झुजार्यांनी आपले जिवाची पर्वा करिनासतना गोंयची मुक्ती कशी केली हो इतिहास सगळ्यां खातीर अभिमानाची गजाल जावन आसा. फुडाराक गोंयची अस्मिताय आनी एकवट अखंड दवरपा खातीर सगल्यांनी योगदान दिवप खूब गरजेचें अशें दाबे सरकारी माध्यमीक विद्यालयाची मुख्याध्यापिका रोशन पैंगीणकार हांणी सांगलें.
दाबे सरकारी माध्यमीक विद्यालयांत गोंय मुक्ती दीस मनयलो. ह्या वेळार विवीध तरेच्या उपक्रमांचें आयोजन केल्लें. हातूंत भुरग्यांनी व्हडा प्रमाणांत वांटो घेतलो.
ह्या वेळार माचयेर पालक शिक्षक संघाचे अध्यक्ष सविता गांवस, शिक्षिका शिखा गांवस, मनीषा चारी, नितीशा पार्सेकार, भाग्यरेखा गांवस, मनोज देसाय, वरूण मळीक, विश्राम मळीक, रक्षंदा गांवस आनी हेर हाजीर आशिल्ले.
ह्या वेळार परंपरीक रितीन दिवली पेटोवन हे कार्यावळीचें उक्तावण जालें. मार्गदर्शन करतना मुख्याध्यापिका रोशन पैंगीणकार हांणी सांगलें, शिक्षणा वांगडा आमचे गोंयचो इतिहास सगळ्यांक खबर आसप गरजेचें. ताका लागून अशे तरेच्यो कार्यावळी सेगीत जावप गरजेचें. समाजाचे उदरगती खातीर सगळ्यांनी जागृत रावपाचो उलो तिणें मारलो.
दाबे सरकारी माध्यमीक विद्यालय हें गांवगिर्या स्वरुपाचें आसा. हांगा गरजेच्यो आशिल्ल्यो सुविधायो शारां परस बरे तरेन उपलब्ध आसात. ताका लागून पालकांनी आपल्या गांवगिर्या वाठारांतली शाळा जिवी उरची देखून आपल्या भुरग्यांक शाळेंत भरती करपाची मागणी पैगिणकार हांणी केली.
ह्या वेळार विद्यालयाच्या सगळ्या शिक्षकांनी गोंय मुक्ती विशीं आपले विचार मांडले. पुराय कार्यावळीचें सुत्रसंचालन किर्ती गांवस हांणी केलें. शिक्षिका नितिशा पार्सेकार हांणी उपकार मानले. ह्या वेळार पालक व्हडा संख्येन हाजीर आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
