भांगरभूंय | प्रतिनिधी
भालचंद्र भावे: वाळपय सरकारी मुळाव्या विद्यालयांत योग दीस मनयलो
वाळपय: योगाक लागून आमची शरिरीक रचणूक घट जाता. ताका लागून सगल्यांनी योग करप खूब म्हत्वाचें. ऋषिमुनीच्या काळांत योगावरवीं शारिरीक रचणुकेचेर भर दिताले. तेन्ना योगाक शारिरीक बळग्याचो मंत्र मानताले. आयज परिस्थिती बदल्ल्या. सद्याच्या कामांत भलायके कडेन लक्ष दिवपाक वेळ मेळना. ताका लागून विंगड विंगड दुयेंसां शरिराक लागू जातात. निरोगी जीण जगपाची आसल्यार योग करात अशें सत्तरी म्हालाचे जिल्हो शिक्षण अधिकारी भालचंद्र भावे हांणी म्हणलें.
वाळपय सरकारी मुळाव्या विद्यालयांत आयोजीत आंतरराष्ट्रीय योग दिसाचे कार्यावळींत ते उलयताले. ह्या वेळार माचयेर पद्मनापस सांप्रदायाचे जयंत फातर्फेकार, विद्यालयाचे मुख्याध्यापक तुळशीदास मयेकार, विद्यालयाचे शिक्षक आनी हेर हाजीर आशिल्ले.
परंपरीक रितीन दिवली पेटोवन कार्यावळ सुरू जाली.
योग दरेकल्याचे भलायके खातीर म्हत्वाचें. हाचे कितले फायदे हे विशीं भावे हांणी म्हायती दिली आनी दरेकल्यान दिसांतल्यान कांय वेळ योगा खातीर काडचो अशी मागणी तांणी केली.
योगशिक्षक जयंत फातर्फेकार हांणी दरेकल्याचे भलायके खातीर योग कितलें म्हत्वाचें हे विशीं खोलायेन म्हायती दिली. शरिराची दूख पयस करची आसल्यार योग करात. विवीध दुयेसां खातीर विवीध आसनां आसात. हे विशीं म्हायती जाणून घेयात. फकत आंतराष्ट्रीय दिसा पुरतोच योग करचो न्हय. दरेका दिसा योग करून सुखी जीण जगची असो उलो तांणी मारलो.
ह्या वेळार आपल्या प्रस्ताविकांत मुख्याध्यापक तुळशीदास मयेंकार हांणी आंतरराष्ट्रीय योग दिसा निमतान सांगलें, समाजांत व्हडा प्रमाणांत योगाचें विस्तारीकरण जावपाक लागलां. ही खरेंच तोखणाय करपा सारकी गजाल. भुरग्यां मदीं योगा विशीं जागृताय जावपाक लागल्या. ताका लागून येवपी काळांत निरोगी समाज निर्मितीचे नदरेन ही व्हड क्रांती आशिल्ल्याचें तांणी सांगलें.
योग गुरु जयंत फातर्फेकार हांणी विंगड विंगड आसनां प्रत्यक्षांत करून दाखयलीं. वांगडा तांचे कसले फायदे हे विशींय म्हायती दिली.
हातूंत विद्यार्थी आनी शिक्षकांनी वांटो घेतलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
