भांगरभूंय | प्रतिनिधी
संवसारीक वन डे क्रिकेट सर्तीचे पात्रताय फेरयेंतले मॅचींत ओमान पंगडान आयर्लेण्डाक 5 विकेटींनी हारयलो. आयर्लेण्डान वन डे क्रिकेटींत पाकिस्तान आनी इंग्लंड ह्या सारक्या बळिश्ट पंगडांक हारयल्यात, ताका लागून ओमाना सारक्या दुबळ्या पंगडां आड तो सहज जिखतलो अशें क्रिकेट मोग्यांक दिशिल्लें. पूण, ओमानान आयर्लेण्डाक धपको दिलो.
मजगती, आनीक एके मॅचींत श्रीलंकेन युएईक 175 धांवड्यांनी हारयलो.
संवसारीक वन डे क्रिकेट सर्त ऑक्टोबर-नोव्हेंबर म्हयन्यांत भारतांत जावपाची आसा. हातूंत 10 पंगड वांटो घेतले. आठ पंगडांचो निर्णय रॅंकिंगेच्या आदाराचेर जाला. हेर दोन पंगडांचो निर्णय पात्रताय फेरयेंत जातलो. पात्रताय फेरयेंत वॅस्ट इंडिज आनी श्रीलंका ह्या पंगडां सयत धा पंगडांनी वांटो घेतला.
झिम्बाब्वेंत चालू आशिल्ले पात्रताय फेरयेंतले दोन टॉप पंगड संवसारीक सर्तीचे मुख्य फेरयेक पात्र जातले.
आयर्लेण्डान पयलीं बॅटिंग करतना 7 विकेटी वगडावन 281 धांवड्यो केल्यो. ओमानान 48.1 ओव्हरींनी 5 विकेटी वगडावन मोख मेळयली.
आयर्लेण्डा वतीन जॉर्ज डॉकरेलान नाबाद 91 धांवड्यांची खेळी केली. जाल्यरा हॅरी टेक्टरान 52 धांवड्यांचें योगदान दिलें. ह्या दोगां खेरीत आयर्लेण्डाच्या हेर खंयच्याच बॅट्समनाक व्हड खेळी करपाक जमली ना. ओमाना वतीन बिलाल खान आनी फैयाद बट हांणी दरेकी दोन विकेटी घेतल्यो.
282 धांवड्यांचो फाटलाव करपाक मैदानांत देंवपी ओमानाची सुरवात बरी जाली ना. कश्यप प्रजापती आनी अकिब इल्यास हांणी डाव सांबाळ्ळो. दोगांयनी 92 धांवड्यांची भागिदारी केली. प्रजापतीन 72 आनी इल्यासान 52 धांवड्यो केल्यो. मुखेली जिशान मसुदान 59 धांवड्यो करून पंगडाक जैत मेळोवन दिवपाक म्हत्वाचें योगदान दिलें. ताचे खेरीत मोहम्मद नदीमान नाबाद 46 धांवड्यांची खेळी केली.
मजगतीं, दुसरे मॅचींत श्रीलंकेन पयलीं बॅटींग करतना 6 विकेटी वगडावन 355 धांवड्यो केल्यो. कुशल मॅण्डिसान सगल्यांत चड 78 धांवड्यो केल्यो. सदिरा समरविक्रमा श्रीलंके वतीन सगल्यांत चड धांवड्यो करपी दुसरो बॅट्समन थारलो. ताणें 64 बॉलांनी 73 धांवड्यो केल्यो. ह्या दोगां खेरीत पथुम निसंकान 76 बॉलांनी 57 आनी दिमुथ करुणारत्नेन 54 बॉलांनी 52 धांवड्यो केल्यो.
मोखीचो फाटलाव करपी युएईक 180 धांवड्यां मेरेन मजल मारप शक्य जालें. श्रीलंके वतीन वानिंदु हसरंगान 8 ओव्हरींनी 24 धांवड्यो दिवन 6 विकेटी घेतल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
