भांगरभूंय | प्रतिनिधी
पौर्णिमा केरकार: ’एक पॅडल आनंदासाठी’ पुस्तकाचें जालें प्रकाशन
केरी-सत्तरी: संकेत नायक हांणी बरयल्ल्या ’एक पॅडल आनंदासाठी’ ह्या पुस्तकांत फकत सायकलीन केल्लीं प्रवासवर्णनाच ना. जाल्यार सायकलीन जंय ते गेल्ले थंयचो सैम, झाडां, न्हंयो, सांस्कृतीक सुवातो, इतिहासीक थळां, लोकजीण, समाजजीण, जेवण संस्कृती, भेसवण अश्या खुबश्या गजालींची म्हायती मेळटा. ताका लागून हें पुस्तक देशाच्या विवीध संस्कृतायेचें प्रतिबींब घडयता. तेन्ना हें पुस्तक एक उत्कृश्ठ पुस्तक म्हणून नामना मेळयतलें, अशें लोकसाहित्य अभ्यासक पौर्णिमा केरकार हांणी म्हणलें.
साखळेच्या कला, विज्ञान आनी वाणिज्य म्हाविद्यालयांत विवेकानंद पर्यावरण जागृती फौज केरी-सत्तरी आनी सांखळे महाविद्यालया वतीन उपक्रमशील शिक्षक आनी सायकलपटू संकेत नायक हांच्या ’एक पॅडल आनंदासाठी’ ह्या पुस्तकाचें प्रकाशन व्हडा उमेदीन जालें. हे कार्यावळीक पुस्तकाचेर म्हायती दितना पौर्णिमा केरकार उलयताली.
संकेत नायक हांणी सायकलीन प्रवास केल्लें गोंय आनी देशांतल्या विवीध थळांचें दर्शन आनी आपले अणभव ह्या पुस्तकांतल्यान मांडले.
ह्या वेळार कार्यावळ अध्यक्ष म्हणून गोवा मराठी अकादमीचे अध्यक्ष प्रा. अनिल सामंत, कार्यावळचे मुखेल सोयरे रानजीव अभ्यासक पराग रांगणेकार, सांखळे सरकारी म्हाविद्यालयाचे प्राचार्य डॉ. जर्वासिओ मेंडीस, विवेकानंद पर्यावरण जागृती फौजचे उपाध्यक्ष संगम पाटील, पुस्तकाचे लेखक संकेत नायक हाजीर आशिल्ले.
प्राचार्य अनील सामंत हांणी संकेत नायक हांच्या पुस्तकाची तोखणाय करीत जीण उमेदीन जगपाक उमेद दिवपी संकेत हांचें पुस्तक वाचपा खातीर आनी जगपा खातीर आसा अशें सांगलें.
पराग रांगणेकार आनी डॉ. जर्वासिओ मेंडीस हांणी ह्या वेळार आपले विचार मांडले.
कार्यावळीचे सुरवातेक बालकलाकार पालवी संकेत नायक, भार्गवी अभिजीत देसाय, स्वराली कृष्णकांत गवस, पुर्वी रामचंद्र मणेरीकार हांणी सैम गीताचेर उत्कृश्ठ तरेन नाच सादर केलो. कार्यावळीक येवकार आनी प्रास्तावीक संगम पाटील, सुत्रसंचालन विठ्ठल शेळके आनी गांवस हांणी उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
