भांगरभूंय | प्रतिनिधी
पुंडलीक हळबेकर: वांतेच्या सुखद चैतन्य उपासना केंद्रांत चार दिसांच्या किर्तनाचो समारोप
वाळपय: किर्तन हें समाजाक जागृत करपाचें एक उत्कृश्ठ साधन. समाजांत जावपी खुबश्यो घडणुको हांचें प्रतिबिंब निर्माण करपी किर्तना वरवीं समाजाची बरे तरेन उदरगत जावपाक शकता. आध्यात्मीक मळाच्या जागृताये खातीर आतां मेरेन किर्तनाचो वापर केला. ताका लागून येवपी काळांत समाज सुसंस्कृत जावपाचो आसल्यार किर्तनाची व्याप्ती वाडप गरजेचें अशें पुणे महाराष्ट्र हांगचे नामनेचे किर्तनकार पुंडलीक विठ्ठल हळबेकर हांणी सांगलें. वांते सत्तरी हांगच्या चैतन्य उपासना केंद्रांत आयोजीत चार दिसांच्या किर्तन सुवाळ्याच्या समारोपा वेळार ते उलयताले.
चार दीस तांणी विवीध विशयांचेर सुंदर तरेन किर्तनां सादर करून हाजीर आशिल्ल्या रसिकांचीं मनां जिखलीं. किर्तन करतना तांणी खुबश्या विशयांचेर बरे तरेन मार्गदर्शन केलें. किर्तन हो समाजाचे उदरगतीचो म्हत्वाचो घटक. आतां मेरेन विवीध विशयांचेर बरे तरेन किर्तना जातात. ह्या किर्तनाचो लाव व्हडा प्रमाणांत नागरीक लाव घेतात. येवपी काळांत किर्तनाची परंपरा अशीच सुरू उरची आनी समाज प्रबोधनाची प्रक्रिया फुडें सरचे खातीर दरेकल्यान किर्तनाचो आस्वाद घेवचो अशी मागणी हळबेकर हांणी केली.
वांते सत्तरी हांगा आशिल्लें सुखद चैतन्य उपासना केंद्र ह्या वाठारांतल्या दरेकल्याची जीण सुखाची करपा खातीर म्हत्वाच्यो कार्यावळी आयोजीत करता. हातूंत नागरीक व्हडा प्रमाणांत वांटेकार जातात.
वट्ट चार दिसांच्या किर्तनात मनोज गणपुले, गुरुदास सुतार, विवेक जोशी हांणी तांकां साथ केली.
केंद्राचे अध्यक्ष गुरुदास सुतार हांणी तांकां फुलांचो तुरो भेटोवन येवकार दिलो आनी ही कार्यावळ आयोजीत करपाचो हेत स्पश्ट केलो. ह्या केंद्रांत सेगीत विवीध कार्यावळींचें आयोजन करतात. ह्या कार्यावळींतल्यान दरेकल्याची जीण सुखी, समृद्ध उरची होच हे फाटलो हेत आसा. येवपी काळांतूय असल्या कार्यावळींनी नागरिकांनी आनी भाविकांनी व्हडा संख्येन हाजीर रावचें अशी मागणी ह्या वेळार तांणी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
