भांगरभूंय | प्रतिनिधी
शुभदा डिचोलकार: पर्यें राष्ट्रीय शिक्षणीक धोरण आनी जनभागीदारी विशयाचेर मार्गदर्शन
केरी-सत्तरी: राष्ट्रीय पांवड्यार आयिल्लीं ध्येयधोरणां राज्य, विभाग, केंद्र आनी शालेय पांवड्यावेल्यान समाजांत पावपा खातीर शिक्षकांचें आनी शिक्षणीक संस्थांचें म्हत्वाचें योगदान आसा. सगळ्याचो आसपाव आशिल्ले हे नवे शिक्षण पद्धतींतल्यान उत्कृश्ठ व्यक्ती घडचो असो मुखेल हेत आशिल्ल्याचें ज्येश्ठ शिक्षिका शुभदा डिचोलकार हांणी स्पश्ट केलें.
श्री भुमिका शिक्षण संस्था संचालीत श्री भुमिका हायस्कूल पर्यें सत्तरी हांगा राष्ट्रीय शिक्षणीक धोरण आनी जनभागीदारी ह्या विशयाचेर पालक प्रबोधन सत्राचें आयोजन केलें. शुभदा डिचोलकार हांणी नव्या शिक्षणीक धोरणांतले मुखेल बदल आनी तांतलीं ध्येयधोरणां हाचेर मार्गदर्शन केलें.
शिक्षण प्रक्रियेंत पालकांचो वांटो कितलो गरजेचो आनी आमी हे प्रक्रियेंत स्वयंसेवक म्हणून कशे मजत करपाक शकतात हाचेर तांणी मार्गदर्शन केलें. पंचकोशात्मक शिक्षण प्रक्रिये विशीं उलयतना ‘नव्या शिक्षणीक धोरणांत अधोरेखीत केल्लीं मुखेल उद्दीश्टां आनी तीं साध्य करपा खातीर विवीध उपाय’ हाचेरूय तांणी मार्गदर्शन केलें.
ह्या वेळार माचयेर हायस्कुलाचे मुख्याध्यापक दिवाकर पोसनायक, पालक शिक्षक संघाचे अध्यक्ष रत्नाकांत म्हाळशेकार हाजीर आशिल्ले.
पालक आनी शिक्षकां खातीर घेतिल्ल्या ह्या मार्गदर्शन सत्रांत ‘निपूण भारत’ ह्या विशयाचेरूय मार्गदर्शन जालें.
ही कार्यावळ येसस्वी करपा खातीर पालक शिक्षक संघाचे पदाधिकारी आनी शिक्षक भारत हुमाणे हांणी विशेश सहकार्य केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
