भांगरभूंय | प्रतिनिधी
तुळशिदास मयेंकार: वाळपय वाचनालयांत राष्ट्रीय वाचन दीस मनयलो
वाळपय: वाचन दरेकल्या खातीर म्हत्वाचें. वाचना वरवीं खुबशे तरेचें गिन्यान मेळतूच आसता. वाचन मनशाच्या बौध्दीक कुशळटायेक वाव दिता. हाका लागून सगळ्यांनी वाचूंक जाय. वाचनाक दिसांतल्यान कांय वेळ दिवप खूब गरजेचें अशें वाळपय सरकारी मुळाव्या विद्यालयाचे मुख्याध्यापक तुळशीदास मयेंकार हांणी सांगलें. वाळपय वाचनालयांत राष्ट्रीय वाचन दिसा निमतान आयोजीत कार्यावळींत ते मुखेल सोयरे ह्या नात्यान उलयताले.
शाळेंत भुरग्यां मदीं वाचनाची आवड निर्माण करता. पूण ही आवड सेगीत तिगोवन दवरप तितलेंच म्हत्वाचें. भुरगीं शाळेंत आसतनाच वाचतात. ते उपरांत वाचपाची संवय बंद जाता. वाचनांतल्यान जायत्या विशयांचेर बरें गिन्यान मेळटा. ह्या गिन्यानाचो फायदो सगळ्यांचे जिणेंत जावप म्हत्वाचो. वाळपय सरकारी ग्रंथालयांत वेगवेगळ्या विशयांचेर बरीं पुस्तकां आसात. हीं पुस्तकां वापरात आनी तुमच्या गिन्यानांत भर घालात अशी मागणी तुळशीदास मयेंकार हांणी केली.
वाचनालयाची मुखेली दिप्ती सावंत हांणी हे कार्यावळीच्या आयोजना फाटलो हेतू स्पश्ट केलो. वाळपय वाचनालयांत व्हडा प्रमाणांत वाचक सदांच येत आसतात. अश्या वाचनालया वरवीं आतां मेरेन बरेंच गिन्यान मेळ्ळां. ह्यता वाचनालयांतल्या वाचकांचो आंकडो दिसान दीस वाडचो हे खातीर यत्न चलयल्यात अशें तांणी आपल्या प्रास्ताविकांत सांगलें.
शीला गांवकार हांणी ह्या वेळार ‘राष्ट्रीय वाचन दिसा’चें म्हत्व सांगून वाचन करप कित्याक गरजेचें हें स्पश्ट केलें.
ही कार्यावळ येसस्वी करपा खातीर वाचनालयाचे कर्मचारी सुधीर सावंत हांचें विशेश सहकार्य मेळ्ळें. तशेंच हे कार्यावळीक वाळपय मुळाव्या विद्यालयाचे विद्यार्थ्यी आनी शिक्षक हाजीर आशिल्ले. सुरवातेक परंपरीक रितीन दिवली पेटोवन कार्यावळीचें उक्तावण जालें. माचयेर हाजीर आशिल्ल्या मानेस्तांक फुलांचे तुरे भेटोवन येवकार दिलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
