भांगरभूंय | प्रतिनिधी
कुठ्ठाळेच्या सेंट जोसेफ वाझ काॅलेजीन ‘स्किल्सबूस्ट : सशक्तीकरण कॉलेज स्टुडेंट्स विथ सॉफ्ट आनी हार्ड स्किल’ ह्या नांवान एक यशस्वी अल्पकाळ प्रमाणपत्र अभ्यासक्रम आयोजीत केलो. हो अभ्यासक्रम 12 दिसांचो आशिल्लो. वट्ट काळ 30 वरांचो. ह्या अभ्यासक्रमांत कॉलेजीची सल्लागार अरोमा डिनिझ हांणी शिकयिल्ल्या मृदु कौशल्यांचेर आनी ग्रंथालय विभागाची मनाली आचार्य हांच्या फुडारपणा खाला कठीण कौशल्य सत्रांचेर भर दिल्लो. ऑफलायन अभ्यासक्रमांत 8 विद्यार्थी आशिल्ले. विद्यार्थ्यांक व्हिन्सेंट फोन्सेका हांचे कडल्यान मुळाव्या अर्थीक साक्षरते विशीं म्हायती मेळ्ळी. ह्या अभ्यासक्रमांत वेवसायीक येसस्वीपणाच्या मुखेल गुणधर्मांचेर भर दिल्लो, जशे की प्रभावी संवाद, भौशीक भाशण आनी भावनीक बुद्धी. विद्यार्थ्यांक विमर्शीक विचार करपाक, विचार आत्मविस्वासान उक्तावपाक आनी समवयस्कांक सहकार्य करपाक प्रोत्साहन दिलें.
ह्या अभ्यासक्रमांत कठीण कुशळटाय, खास करून तंत्रीक आनी संगणकीय क्षमता विकसीत करपाचेर भर दिल्लो. भाग घेवप्यांक वेव्हारीक नेमणुकां वरवीं वेव्हारीक गिन्यान मेळोवपाची संद मेळ्ळी आनी तांच्या निमाण्या वर्साच्या प्रकल्पां खातीर गरजेच्या म्हत्वाच्या संशोधन कुशळटायांचो मुळावो नियाळ घेवपाक मेळ्ळो. प्राचार्य डॉ. मारिया फोन्सेका हांणी ह्या निकालांचेर समाधान उक्तायलें, ‘आमी आमच्या विद्यार्थ्यांक शिक्षणीक मळा भायर सशक्त करपाचेर आनी खऱ्या संवसारांतल्या आव्हानां खातीर तयार करपाचेर विस्वास दवरतात. स्किलबूस्ट अभ्यासक्रमान विद्यार्थ्यांक तांची मृदु आनी कठीण कुशळटाय वाडोवपाक, तांकां सक्षम करपाक एक मोलादीक मंच दिलो.’
अभ्यासक्रमांत वांटेकार जाल्ल्या लिली नायक, स्वप्ना नायक, नेहा पांडे, आशिष गुप्ता, फ्लॉसी लुकास, प्रज्ज्वल सावंत, लविना फर्नांडीस आनी रोहित लमाणी हांकां पूर्णतायेचें प्रमाणपत्र दिवन अभ्यासक्रम सोंपलो. विद्यार्थ्यांच्या विकसीत जावपी गरजांक पाळो दिवपा खातीर आनी तांची वेवसायीक वाड सुलभ करपा खातीर फुडाराक अशे मोल जोडिल्ले अल्पकाळ अभ्यासक्रम घडोवन हाडपाची येवजण सेंट जोसेफ वाज कॉलेजीन आंखल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
