भांगरभूंय | प्रतिनिधी
भारताची तलवारबाज (फॅन्सर) भवानी देवीन चीनाच्या वुक्सी शारांत चालू आशिल्ले आशियायी फॅन्सिंग वस्तादपण सर्तीचे बायलांच्या सेबर प्रकारांत कांश्या पदक जिखून इतिहास घडयलो.
सेमी फायनलींत हारिल्ल्यान तिका कांश्या पदकाचेर समाधान मानचें पडलें आसलें तरी तिणें भारता खातीर इतिहास घडयलो. तिचे पयलीं दादल्यांच्या वा बायलांच्या गटांत भारतान एकूय पदक जिखूंक नाशिल्लें.
सेमी फायनलींत भवानी देवीक उज्बेकिस्तानाचे जेनाब डेयिबेकोवा आड चुरशीचे मॅचींत 14-15 अशा फरकान हार घेवची पडली.
ते पयलीं क्वॉर्टरफायनलींत भवानी देवीन सध्याची संवसारीक वस्ताद जपानाचे मिसाकी एमुरा हिका 15-10 अशा फरकान हारोवन सगल्यांक अजापाचो धपको दिल्लो. मिसाकीन काहिरांत 2022त जाल्ले संवसारीक फॅन्सिंग वस्तादपण सर्तींतल्या सेबर प्रकारांत भांगरा पदक जिखिल्लें.
29 वर्सां पिरायेचे देविका देवीक रावण्ड ऑफ 64त फुडली चाल मेळिल्ली. उपरांत फुडले फेरयेंत तिणें कझाकस्तानाचे डोस्पे करिनाक हारयली. ऑलिम्पियन खेळगडेन प्री क्वॉर्टरफायनलींत तिसरे सुवाते वयले ओजाकी सेरीक 15-11 फरकान हारयिल्ली.
फॅन्सिंग असोसिएशन ऑफ इंडियाच्या म्हासचीव राजीव मेहतान भवानी देवीक इतिहासीक प्रदर्शनाक लागून परबीं भेटयली.
भारताचे फॅन्सिंग खातीर म्हत्वाचो दीस आसा अशें राजीव मेहतान म्हणलें. टोकियो ऑलिम्पिकांत भवानी देवीचें आव्हान रावण्ड ऑफ 32त सोंपिल्लें. तरी पूण टोकयो ऑलिम्पिकांत तिणें इतिहास घडयलो. तिणें सेबर प्रकारांत ट्युनिशियाचे नादिया बेन अजीजी हिका हारयिल्ली. ऑलिम्पिकाच्या इतिहासांत भारताची ती पयली फॅन्सिंग मॅच आशिल्ली. भवानी देवीन राष्ट्रकूल खेळां सर्तींत दोन भांगरा पदकां जिखल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
