भांगरभूंय | प्रतिनिधी
मोटार चालका सयत धनयाक अटक; मोटार जप्त
भांगरभूंय । प्रतिनिधी
म्हापशें: पर्वरे राष्ट्रीय म्हामार्गा वयल्यान मोटारीचीं तीन दारां उक्तीं दवरून स्टंट करपी दुबावीत फहीध हामजा (37, रा. शिवामंद नगर, धारवाड, कर्नाटक) ह्या मोटार चालकाक पर्वरी पुलिसांनी अटक केली.
हो प्रकार आयतारा मध्यान रातीर 12.15 वरांच्या सुमाराक पर्वरेच्या जिवोत्तम मठ ते ओ कोकेरो जंक्शन हाचे मदीं म्हामार्गार घडलो. दुबावीत मोटार चालक आनी ह्या मोटारींतल्यान प्वसा करपी हेर दोगांनीय मोटारीचीं तीन दारां उक्तीं केलीं आनी म्हामार्गाचेर मोटार चलोवन जिवघेणो स्टंट करपाचो यत्न केलो.
हो प्रकार हे मोटारी फाटल्यान वचपी म्हापशेंचे सिद्धार्थ मांद्रेंकार आनी सांगात्यांनी आपल्या मोबायलाचेर व्हिडियो रिकॉर्ड केलो आनी सोशल मिडियाचेर व्हायरल केलो. हो व्हिडियो गोवन वार्तान आपल्या सोशल मिडिया प्लॅटफॉर्मा वयल्यान व्हायरल केलो. हाची दखल घेवन पुलिसांनी रोखडीच कारवाय केली.
मोटारीच्या जीए 03 सी 9203 नंबरा वयल्यान मोटारीच्या धनयाचो पुलिसांनी सोद घेतलो आनी सोमारा दनपारां दुबावी मोटार चालक आनी धनयाक ताब्यांत घेतलो. उपरांत खोलायेन चवकशी करून दुबावीत मोटार चालक फहीध हामधा हाचे आड मोटार वाहन कायद्या खाला गुन्यांव दाखल केलो आनी अटक केली. ते भायर मोटारूय जप्त केली. मजगतीं, रामनगर- पर्वरीच्या संबंदीत मोटार धनया आड पुलिशे कडल्यान फुडली कारवाय करतले. फुडलो तपास पुलीस निरिक्षक अनंत गांवकार हांच्या मार्गदर्शना खाला पुलीस करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
