भांगरभूंय | प्रतिनिधी
15 जुलय मरेन तवशीं बाजारांत येवपाची शक्यताय
भांगरभूंय । प्रतिनिधी
फोंडें: फोंडें आनी मडगांवच्या बाजारांनी जूनाच्या पयल्या सप्तकांत मेळपी तवशीं अंदूं पावसाक कळाव जाल्ल्यान अजून पावूंक नात. पावसाक आनीक कळाव जालो जाल्यार ताचो परिणाम तवशाच्या उत्पादनाचेर जावपाची शक्यताय आसा. अशें जालें जाल्यार शेतकार अर्थीक संकश्टांत सांपडटले.
जूनाच्या पयल्या सप्तकांत बाजारांत व्हड प्रमाणांत दिसपी तवशांच्यो राशी अजून नदरेक पडनात. पावस उसरां आयिल्ल्यान शेतकारांनी तवशांचें मळे लावपाक उशीर केलो. फाटल्या 4- 5 दिसां सावन तवशांचे मळे लावपाक सुरवात जाल्या. 15 जुलय मेरेन ह्या मळ्यांतलें पीक बाजारांत दिसपाची शक्यताय आसा.
फर्मागुडी वाठारांतल्या दोंगराळ वाठारांत व्हड प्रमाणांत तवशांचें पीक घेतात. शिरोडें, प्रियोळ, बेतोडें वाठरांतले शेतकार पावसाळ्यांत व्हड प्रमाणांत तवशांचें आनी हेर भाजयांचें पीक घेतात. फोंडें, मडगांव, पणजी तशेंच हेर वाठारांतल्या बाजारांनी तवशांक तशेंच पिंपऱ्यांक व्हड मागणी आसता. पूण पावसान येवपाक कळाव केल्ल्यान तवशीं आनी पिपऱ्यो बाजारांत येवपाक कळाव जातलो.
धोंडशी वाठारांतले निळू गावडे हे पुर्वजां पासून फर्मागुडये वयल्या दोंगराचेर तवशांचे मळे लायता. तांणी हे विशीं उलयतना सांगलें, पावसाळ्यांत तवशांचे आनी हेर भाजयांचे मळे शेतकारां खातीर फायद्याचे थारतात. पूण अंदूं पावसाक उसरां सुरवात जाल्ल्यान पिकांचेर परिणाम जाला. फुडल्या म्हयन्यांत 15 तारके उपरांत बाजारांत तवशीं मेळपाक सुरवात जातली. नकासा नरेंद्र गावडे हांणी हे विशीं अदीक म्हायती दितना सांगलें, फर्मागुडये वयल्या दोंगराळ वाठारांत व्हड प्रमाणांत तवशांचें पीक घेतात. मडगांव बाजारांत व्हड प्रमाणांत तवशीं विकपा खातीर व्हरतात. थंय तवशांक बरो दर मेळटा. हे खातीर सगळे शेतकार सगळीं तवशीं एकठांय करून मडगांव बाजारांत धाडटात. पूण अंदूं पावस उसरां सुरू जाल्ल्यान ताचो परिणाम पिकांचेर जावपाची शक्यताय आसा. पिकांचेर परिणाम जालो जाल्यार शेतकारांक अर्थीक लुकसाण सोंसचें पडटलें, अशें तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
