भांगरभूंय | प्रतिनिधी
शेनवारा, आयतारा लायट ना; लोकांचें पासियेंस सोंपलें
भांगरभूंय । प्रतिनिधी
वाळपयः सत्तरी म्हालांतल्या सावर्डें पंचायत वाठारांतल्या करंझोळ, कुमठोळ, करमळी ह्या वाठारांनी शेनवारा आनी आयतारा वीज पुरवण बंद आशिल्ली. ताका लागून पासियेंस सोंपिल्ल्या सुमार 100 थळाव्या लोकांनी आयतारा राती वाळपय वीज उपकेंद्राच्या कार्यालयाचेर मोर्चो व्हरून आपली तिडक उक्तायली.
सोमारा सकाळीं वीज पुरवण सुरळीत जाली. पूण थंय आशिल्ले बंच केबल काडून भुंयगत वीज केबल घालचे, अशी मागणी थळाव्या लोकांनी केल्या. हे संबंदांत थळावे लोक थळाव्या आमदारांक मेळटले, अशी म्हायती मेळ्ळ्या.
सत्तरी म्हालांतल्या खूबशा वाठारांनी बंच केबल घातल्यात. फाटल्या 15 दिसां सावन तातूंत नेमान बिघाड जायत आसा. ताका लागून सत्तरी म्हालांत वीज पुरवण बंद जावपाचे प्रकार दिसान दीस वाडपाक लागल्यात. 15 दिसां आदीं नगरगांव पंचायत वाठारांतल्या ब्रह्मकरमळी, शेळप, शिंगणे ह्या वाठारांतल्या लोकांनी वाळपयच्या वीज उपकेंद्राचेर मोर्चो व्हरून तिडक उक्तायल्ली. ते उपरांत वीज कार्यालया वतीन विशेश लक्ष दिवन बंच केबलाच्यो पोरणें कनेक्शन परतून एकदां दुरुस्त केल्लें.
मेळिल्ले म्हायती प्रमाण सावर्डे पंचायत वाठारांतल्या करंजोळ, कुमठोळ आनी करमळी ह्या तीन गांवांतली वीज पुरवण शेनवारा बंद जाल्ली. हे संबंदांत कागाळी केले उपरांत शेनवारा रातीं उसरां वीज पुरवण जाग्यार घातिल्ली. मात आयतारा सकाळीं परतून एकदां वीज पुरवण पुराय दिसा खातीर बंद जाली. ताका लागून लोक खुबळ्ळे. रात मेरेन वीज पुरवण सुरळीत जातली म्हूण तांणी वाट पळयली, आनी अखेर सुमार 100 लोकांनी वीज उपकेंद्र कार्यालयाचेर मोर्चो व्हरून जाब विचारलो.
शेनवारा राती वीज पुरवण बंद जाले उपरांत आयतारा सकाळच्यान दुरुस्तीकाम हातांत घेवपाक जाय आशिल्लें. मात हाचे कडेन आडनदर केल्ल्यान लोकांचे पासियेंस काबार जालें आनी तांणी आयतारा आपली सगळी तिडक भायर काडली. आयतारा उसरां मेरेन लोक वीज उपकेंद्राच्या कार्यालया कडेन राविल्ले, पूण त्या वेळार अधिकाऱ्यांची भेट जावंक नाशिल्ल्यान ते घरा गेले. वाळपय वीज उपकेंद्र कार्यालयान सोमारा दुरुस्तीकाम हातांत घेतलें आनी सकाळीं 11 वरांच्या सुमाराक वीज पुरवण जाग्यार घातली.
खंडीत विजेचो उदका पुरवणेचेर परिणाम
नेमान वीज पुरवण बंद जाल्ल्यान ताचो परिणाम उदका पुरवणेचेर जाता. दिसांतल्यान खूब खेपे वीज पुरवण खंडीत जाता. ताका लागून दाबोस उदका प्रक्लपाची यंत्रणा बंद पडटा. परतून ती सुरू केले उपरांत रिती जाल्ली उदकाची पायपलायन भरपाक खूब वेळ वता. ताका लागून खूबशा वाठारांनी पियेवपाच्या उदकाचो उणाव निर्माण जाता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
