भांगरभूंय | प्रतिनिधी
हेमा नायक: ‘मोहिनी स्मृती पुरस्कार’ भेटवण कार्यावळ उमेदीन
पणजी: मृतिशेश नागेश करमली हांचे कल्पनेंतल्यान साकार जाल्लो ‘मोहिनी स्मृती पुरस्कार’ हीं उतरांच नागेशबाबांचो विस्तारवादी दिश्टीकोन नदरे मुखार हाडटा. आपले बायलेक आपली सांगातीण मानून तिका समान पांवडो जायते दादले दितात. पूण आपले घरकान्नी विशीं आपल्याक आशिल्लो आदर उक्तावपाक तिच्या नांवान पुरस्कार दवरुपी नागेशबाबांचो आदर्श सगळ्यांनी घेवचो अशें ज्येश्ठ कोंकणी लेखिका हेमा नायक हांणी सांगलें.
‘मोहिनी स्मृती पुरस्कार 2022’ भेटवण सुवाळो हालींच पणजेच्या डेलमन हॉटेलांत संपन्न जालो. त्या वेळार मुखेल सोयरी ह्या नात्यान त्यो उलयताल्यो.
कोंकणींतली नामनेचे कवी आनी कार्यकर्ती नूतन साखरदांडे, माया खरंगटे, नयना आडारकार आनी अशोक भोंसलो हांका अंदुंचो ‘मोहिनी स्मृती पुरस्कार’ फावो जालो. मानपत्र, शाल, श्रीफळ आनी रोख दुडू अशें पुरस्काराचें स्वरूप आशिल्लें.
आपल्या घरकाराक त्याच आदरान पळोवपी मोहिनीबाय म्हणल्यार आदर्श घरकान्नीची एक देख. गोंय मुक्तिलढ्यांतले जावं कोंकणी चळवळींतले लोक नागेशबाबाच्या ओढीन तांच्या घरा वताले आनी मोहिनीबायच्या मोगाळ आदरान तांचे घरचेच जाताले अशें हेमा नायक हांणी मुखार सांगलें.
आयचे मोहनी पुरस्कार मानेली हे कोंकणी चळवळ तशेंच साहित्यांत ‘रायटर आनी फायटर’ ही भुमिका निभावपी. आमचे पिळगेक ह्या सगल्यां कडल्यान आवयची माया मेळ्ळ्या अशें रविंद्र केळेकार, विद्यामंदिराचे हेडमास्तर अनंत अग्नी हांणी म्हणलें. ते मुखेल सोयरे म्हणून हे कार्यावळी वेळार उलयताले.
झुजा मळार जायते सैनीक आपलें रगत व्हावयता. पूण तांची सेवा सहसा कोणाच्या लक्षांत येना. पूण झूज जिखपा खातीर तांचो म्हत्वाचो वांटो आसता. कोंकणी मायेची सेवा करपी ह्या मानेल्यांक पुरस्कार भेटोवप ही आमच्या कुटुंबा कडल्यान 2019 सावन घडत येवपी ही कोंकणीची ल्हानशी सेवा अशें नागेशबाब आनी मोहिनीबायचे पूत प्रा. रामदास करमली हांणी म्हणलें.
पुरस्कार मानेलींचे वतीन उलयतना नुतन साखरदांडे हांणी म्हणलें, ‘नागेशबाबान आमची भाभी मोहिनीबाय हांच्या नांवान दवरिल्लो प्रतिश्ठेचो पुरस्कार ‘त्रिवेणी’ म्हणल्यार नयना, माया आनी म्हाका, तशेंच कोंकणी खातीर आमच्या सांगातान वावुरपी अशोक भोसल्याक फावो जालो आनी म्हजी खोस दुपेटीन वाडली अशें सांगलें.
कार्यावळीचे आयोजक संजना पब्लिकेशनाचे धनी दिनेश मणेरकार हांणी येवकार दिलो. नागेशबाबाची नात आयेशा हाणें फुलां भेटयलीं. शंकुतला भरणे हांणी सुत्रसंचालन केलें. ह्या वेळार नागेशबाबांची धूव शैला केळुस्कार आनी हेर मानेस्त हाजीर आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
