गंडभैरांवालें बाणीवेलें बोट !

भांगरभूंय | प्रतिनिधी

एक अणभव – 12

हें हावसिंग सोसायटीचें कथानक प्रत्यक्ष अणभवांचेर आनी कांय काल्पनीक गजालींचेर आदारून आसा. प्रत्यक्ष जिवो वा मरण आयिल्लो मनीस, घडणूक हांचे कडेन हाचो संबंद ना. तो जुळत जाल्यार निव्वळ एक योगायोग समजुचो. – लेखक

गंडभैरांवान फोडाफोडी करून आमचे विरुद्ध हें भयाचें वातावरण निर्माण करूंक यश मेळयिल्लें
(आतां मुखार….)

गंडभैरांवालें तांडव चालूच आशिल्लें. सूर- रोंट घालून जातगेर म्हारु गंडभैरावाच्याच गोमटेर वचून बसला काय कितें, अशी परिस्थिती जाल्ली. आमी भावनिक जाऊन आक्ताक राजीनामो दिवचें केल्लें, ई- मेलाचेर विस्वास थाराव तर मागायिल्लो, पूण चडशे वांगडी वगी राविल्ल्यान तो अर्थहीन जाल्लो. स्वताक सावरत आनीक गंडभैरांवाक चोख प्रत्युत्तर दित आमी सगळ्या वांगड्यांक ई- मेल घालून सांगलें की गंडभैरांव धरून तुरंत जर कोणाकूय फुडें सरून सोसायटी चलोवची आसा जाल्यार तशें सांगात, आमी केल्या ती जर चूक तर आमी आपखोशयेन फाटीं सरतात आनीक बरें करून चलोवपाक जे मुखार येतात तांचे कडेन सोसायटीचो ताबो दितात. गंडभैरांव हो कांबळी फुज्यांव, तो स्वतः फुडें सरचोना, तो फक्त दुसऱ्याला खांदार बंदूक दवरून फार मारपाचो हें आमकां खबर आशिल्लें. आमकांय हीं विकतीं श्राद्धां नाकाशिल्लीं, पूण आमी चिखलांत उडी मारून जाल्ली आनी गंडभैरांवरूपी किडीन आमचेर हल्लो करून आमचें जिणें हराम करून सोडिल्लें. आमकां हे किडीक त्रांतार करीत फुडें वच्चें आसलें. जे कोणे दुडू सोसायटीच्या खात्यांक धाडिल्ले तांकां ते आमी परत धाडपाचो थाराव, समितीची मीटिंग आपोवन ज्या ज्या पास केलो आनीक सगळ्या कडल्यान तांच्या बॅंकेचे तपशील घेवन परत धाडुनय दिले.
आमी राजीनामो दितां म्हणिल्लें, हाचेंय गंडभैरांवाक नाकसुरें गेल्लें. तो आपल्या हातांत दोरी धरून कठपुतळी बावल्यां बशेन आमचो उपेग करून आपूण हिरो जावपाक सोदतालो. आमीय हातांक कांकणां घालून बसूंक नाशिल्ले. ताच्या उत्तराक प्रत्युत्तर दिताले. गंडभैरावाच्या फुडारपणाखाल ई-मेलाचे फारार फार जावूंक लागिल्ले. हांव भोंवडेर गेल्लो थंय म्हजीय वाट लागिल्ली. मानसीक अस्वस्थताय जाणवताली. भोंवडेची मजा वा आनंद लुटूंक लक्ष लागनाशिल्लें. होळोम्ब घालीत घाली-त ताणें पंधरा सुमार वांगड्यांची आपल्या मेलाचेर सायन करून घेतिल्ली. हातूंतल्या थोड्या वांगड्यांनी दोळे धांपून कठपुतळी बावलें जायत सायन केल्ली. अर्थात हे वांगडी दोळे धापून गंडभैरांव म्हणटा तेंच्च खरें मानपी आशिल्ले. मागीर तें सारकें आसूं वा चूक. हाचें विश्लेशण करूंक तांकां वेळ आनी पाशियंसूय नासतालें. एका तेंपार हांवूय तांतुतलोच आशिल्लो जेन्ना हांव भायर काम करतालों. थोडे गंडभैरांवाचें उलोवणे आयकून मुद्रित जावन ताका तेंको दिवपी आशिल्ले. वेण्णा धरून दोन- तीन लोकांनी तर नॉन ऑक्युपन्सीचे दुडू वाटावंक सायनी केल्ल्यो. हातूंतय ते स्वताचो फायदो पळयताले. ‘आवयक पडलां आनाचें, आनाक पडलां मिणाचें’ अशीच गत ती आशिल्ली.
गंडभैरांवाच्या फुडारपणा खाल चलिल्ल्या प्रत्येक आरोपाचेर बारिकसाणेन फोडाफोडी करीत परत एकदां आमी तपशीलवार उत्तरां दिल्लीं. ‘अवदिसा भेटे आनी कापसार कपल फुटे’अशी आमगेलीय अवस्था जाल्ली. आमगेलीय गाडी रुळा वयल्यान घसरिल्ली. पाशिंयस काबार जावंक आयिल्लें. जिवाचो वित्राग आयिल्लो. ‘बाबण्णा, कित्या रे तुवें म्हाका विकलें हें घर’ अशें म्हणीत हांवें बाबण्णा कडे वोग काडिल्लो. सगली तिडक भायर काडिल्ली.
कॉमन लुगारा वेल्यान व्हडलो शेरमांव परत एकदां बरयत गंडभैरावांन आमचेर कितलेशेच आरोप लायिल्ले. इस्क्रीतूराक कितें बरयला ताचें विश्लेशण करीत आपलें ज्ञान ताणें परजळायिल्लें. कॉमन लुगार सोसायटीच्या नांवार करून जायना आनीक इस्क्रीतूरांतले तें कलम रद्द करूंक एक मेमोरँडम करया, अशें तर आमकां बिल्डराल्या आदवोगादान पुसून सांगून जाल्लें आनी आमी तशें वांगड्यांक बी बरयिल्लें. पूण स्वताक सुप्रीम कोर्टाच्या जुईजा परस व्हड समजूपी गंडभैरांव आमी पयलीं जें कितें म्हणिल्लें तेंच म्हणणे बाणीर बोट जाल्लेवरी घेवन बशिल्लो.
हे वटेंन आमी बिल्डराक मेल घालून विनवणी केली की तांचो मेन्टेनन्स कॉन्ट्रॅक्ट तीन महिने तरी मुखार व्हरचो. बिल्डराची भेट मेळप आमच्या खातीर तरी अशक्य दिसतालें. व्हडल्या सायबान कामांत लक्ष घालचें कमी केल्लें आनी कोणेय कागाळी घेवन गेल्यार बी ताका आवडनाशिल्लें. आमकांय बी ताका धोंसुक बरें दिसनाशिल्लें. धाकटो सायब जो सगळे व्याप सांभाळटालो तो ऑफिसाक वाऱ्या भशेन येतालो आनीक वतालो. ताका मेळप, ताच्या कॅलेंडरार स्लॉट मेळोवप आमच्या सारक्यांक तरी अशक्य आशिल्लें. तातूंत त्या खिणाक आमी सगळे भायर आशिल्ल्यान वाट कशी काडप हो आनीक एक प्रस्न आशिल्लो.
राणेसायब हो एकटोच आमचो आशेचो किरण आशिल्लो. ताचे मदतीन आमकां रोखडेंच उत्तर मेळिल्लें. पयलीं सगळे वांगडी डायरेक्ट बिल्डराक दुडू धाडटाले तशें कोता येंवपाना, सोसायटीन एकूच चेक दिल्यार दोन म्हयने मुखार स्टॉप- गॅप म्हणून चलयतात, अशें उत्तर आमकां आयलें. राणेसायबाचे आभार मानीत सुटकेचो स्वास त्या खिणाक आमी सोडलो. दोन म्हयने जाल्यार दोन, तितलेच पुरो, स्पेसिअल जनरल बॉडी मिटिंग घेवन तातूंत थाराव पास करया आनी जायना जाल्यार वा जायसर आमी पांचूय लोक आमच्या आंगार घेवन आमगेले कमिटमेंट पुराय करुन मेंटेनन्स अखंडतायेन चालू दवरया, अशें आमी थारायलें.
एके वाटेन आमकां स्पेसिअल जनरल बॉडी मिटिंग आपोवची आशिल्ली आनी दुसरे वटेन रजिस्ट्रार ऑफिसाक वचून वेंचणूक घेवपाची बी प्रक्रिया समजून घेवची आशिल्ली. हांव आनी तीमण्णा दोगांयनीय परत रजिस्ट्रार ऑफिसाक फावटी घालूंक सुरवात केल्ली. कोविडाचो त्रास परत सुरु जाल्लो. केशी वाडूंक लागिल्ल्यो. आता मेरेन रजिस्ट्रार ऑफिसाक दोन- चार वळखी जाल्ल्यान आडामो काढून सरळ भितर वचूंक कोण आडखळ हाडिनाशिल्ले. हे खेपेय आमी गेल्ले कडेन एक देवमनीस आमकां मेळ्ळो आनी ताणें आमकां सगळी प्रक्रिया समजायली. आमका ताणें सांगले, कोविड केशी वाडिल्ल्यान दोन दिसांनी ऑफिस बंद जातलें आनी फुडलीं ऑर्डर येयसर बंदच उरतले. ताका आमची केश सांगतकच तो आमकां मदत करूंक तयार जालो. आनी त्या वेळार जर ताका जाय ते दुकुमेंट आनी फॉर्मा भरून दित तो तेन्नाच प्रक्रिया चालू करपाची ताणें तयारी दाखयली. अशे ताणें सांगतगेर आमी वेळ कन्नास्तना फॉर्मां भरलीं, घरा येऊन बाकीचे दुकुमेंट एकठांय करीत छापून हाडलें आनीक परत सांजवेळा वचून ते ताका दिले. आमगेली ऑर्डर टायप जायसर आमी थंय बसले आनी ती घेवन नोटीस बोर्डार लायली आनी वांगड्यांक ई- मेल केली. निवडणूक प्रक्रियेची सुरवात तरी जाल्ली.
स्पेसिअल जनरल बॉडी मिटिंग घेवचे खातीर आमी नोटीस काडली, हातूंत एक ऑडिट रिपोर्ट पास करचो आशिल्लो, जो पयल्या वर्साचो, जातूंत दुडवांचे कमीत कमी वेव्हार आशिल्ले, पूण तो पास करची फोरमालदाद करची आशिल्ली. आनीक दुसरें म्हळ्यार बिल्डरा कडे कंत्राट वाडयिल्ली ताचेखातीर वांगड्याची मान्यताय घेवची आशिल्ली.
ह्यो फोरमालदादी पुराय जाता आनी नोटीस धाडता म्हळ्यार गंडभैरावांन कुतां काडीत परत ई- मेलाचो फार मारलो. ह्या कांयच नाशिल्ल्या ऑडिट रिपोर्टा भितरय ताका चुक सांपडिल्ली. गंडभैरांव रुपी हे ‘मसण्या आवय सवंग’ आमची फाट कशीच सोडनाशिल्लें. एक सुखाची न्हिद घेवंक तो दिनाशिल्लो. समस्येचें, आडखळीचें निरासन करचें सोडून आमी बेगीन वेंचणूक मागयतात असो नवो आरोप आपल्या तीन पानाच्या मेलांत ताणें आमचेर केल्लो. ‘दुकर मारूकय व्हेल्यार रडटालो आनी पोसुंकय वेल्यार रडटालो.’ तो घेवन बशिल्ले बाणीवेले बोट हालोवपाची ताचीं कशींच लक्षणां नाशिल्लीं. फाटले वटेन तो वेगळेंच कुभांड रचतालो!.
(फुडें चलता….)

अजय करमली
  93737 46957