दोतोरकी

भांगरभूंय | प्रतिनिधी

तुमी कितले आड्डून सांगलें तरी आजुनूय जायत्या जाणांक वैजकी फाट्यांत प्रवेश जाय आसता. गोंयां भितर एकूच कॉलेज आसा, पूण सुवाती देडश्यांचेर पावल्यात. सद्या देशांत ह्यो सुवाती आसात, 1 लाख 658 तातूंत आतां 8 हजार 195 इतल्यो सुवाती वाडपाच्यो आसात. राष्ट्रीय वैजकी आयोगान अंदूं 50 नव्या कॉलेजांक परवानगी दिवपाचें थारायलां. हातूंत 30 सरकारी तर 20 खाजगी हॉस्पिटलां येवपाचीं आसात. हाचो अर्थ सुवातो वाडटल्यो. जायत्या जाणांक हें खबर आसा की ह्या सुवातां खातीर तुमकां ‘नीट’ ही परिक्षा पास जावपाक जाय. उपरांतूच तुमची सुवात नक्की जाता. हातूंत सर्त खूब आसल्या कारणान पयसो आशिल्ले परदेशाक वतात. सरकाराचे नजरेन ह्यो गजाली आयल्यात. म्हणून तर 2014 सालांन 51348 आशिल्ल्यो सुवाती आता 2023 सालांत एक लाख 7658 जाल्यो.
नवी कॉलेजां आंध्र प्रदेश, आसाम, गुजरात, हरियाणा, जम्मू काश्मीर, कर्नाटक, मध्य प्रदेश, महाराष्ट्र, नागालॅन्ड, ओडिशा, राजस्थान, तामिळनाडू, तेलंगण, उत्तर प्रदेश आनी पश्चिम बंगालाक जावपाचीं आसात. हाचो लाव काय वर्सांनी मेळटलो. एमबीबीएस शिकपा खातीर सुवात मेळप कठीण तर आसताच, पूण ताचे पयलीं नीट परीक्षा पास जावप गरजेचें आसता. हाची तयारी जर तुमी आदी पासुनूच करपाक लागत तर तुमचो वावर चड सोंपो जावं येता. 2012 सावन नीट परीक्षा चालीक लागली. ताचे पयलीं गोंयां भितर जीसीईटी परीक्षा दिवची पडटाली. एक उदात्त करियर म्हूण दोतोरकीच्या फाट्याक लोक पळयतात. लोकसेवा, देशसेवा करपाचें व्हड उदाहरण म्हूण आमी ह्या फाट्याक पळयतात.
ह्या प्रतिश्ठेच्या फाट्यांत फुडें तुमकां एनेटॉमी फिजिओलॉजी बायोकेमेस्ट्री सारके विशय शिकचे पडटात. जे विशय शिकपाचे आसात ताची तुमी पयलीं म्हायती घेवपाक जाय. विज्ञानाचे विद्यार्थीच ह्या फाट्यांत वचूं शकतात. जे विद्यार्थी भौतिक रसायन आनी जीवशास्त्र विशय अकरावी, बारवेक घेतात ते विद्यार्थी नीट (national eligibility entrance test) परीक्षा पास जाले उपरांत दोतोरकी शिकपाक पात्र थारतात. म्हण्टकच ह्या विशयाचो अभ्यास बरे पैकी करपाक जाय हें आयलेंच. बऱ्या कोलॅजींनी जर तुमकां प्रवेश जाय तर हे नीट परिक्षेंच तुमकां चड मार्क आसूंक जाय. जर तुमकां हेर फाट्यांनी वचपाचें आसा, जशे बीडीएस, बीएएमएस, बीएचएमएस, फिजिओथेरपी हांतूंनुय तुमी प्रवेश घेवं शकतात. वट्ट साडे पांच वर्सा हातून घालोवप गरजेचें. हातूंतलें एक वर्स तुमकां इंटर्नशिप करची पडटा, जर तुमकां सरकारी कॉलेजांत प्रवेश मेळ्ळो तर फी कमी लागतली, पूण जर खाजगी महाविद्यालयान प्रवेश मेळ्ळो तर चड फी दिवपाची तयारी आसपाक जाय. आतां फक्त पदवी मेळोवन जायना तर speciality, superspeciality तुमकां आताचे परिस्थितींत करपाकूच जाय.
‘नीट’ पास जाले उपरांत व्हेटर्नरी स्पीच थेरपीचोय तुमकां पर्याय आसा. पदव्युत्तर शिकपूय (एमडी नाजाल्यार एमएस) करपाक जाय. कांय जाण परदेशान वचून ही पदवी घेतात. तांकां मागणी आसता. हे कोर्स तीन वर्सांचे आसतात. समजा तुमी जर परदेशांत गेले तरी भारतांत तुमकां प्रॅक्टिस करपाची आसा तर तुमकां हांगासरली परिक्षा दिवची पडटा. समजा एखाद्या देशांत तांची जी भास आसा ती शिकची पडटा. सगळे कडेच इंग्लीश भास चलता अशें ना. गोंयांत तुमकां इंग्लिशींत शिकपाक मेळटा. मध्य प्रदेशांत नव्या शिक्षणिक धोरणा प्रमाण वैजकी, अभियांत्रिकी पुस्तक लेगीत हिंदी भाशेंत तयार केल्यांत. सगळ्या राज्यांनी ही पद्दत कांय वर्सांनी दिसूं येता. खंयचेय परिक्षे प्रमाण नीट परिक्षेक लेगीत येवजण लागता आनी मुखेल गजल म्हळ्यार सराव तर गरजेचो.
आमच्या देशांतली पयली डॉक्टर जावन आशिल्ली आनंदीबाई जोशी. त्या वेळार ती अमेरिकेक वचून शिकली. दोतोरां भितर ल्हान भुरग्यांचो , बायलांचो, जनरल, कान- नाक- ताळो, काळजाचो अशे प्रकार दिसतात. तुमच्या आवडीच्या प्रकारान तुमी फुडें शिकात. पूण जर दोतोर जातले तर आतां सावनूच तयारेक लागात. सद्या मेडिकल कॉलेजांत 180 सुवाती आसात त्यो 250 करपाचो यत्न आसा.

प्रा रामदास केळकार
9822583275