भांगरभूंय | प्रतिनिधी
एलएचबी डब्यांचे पयले गोवा एक्सप्रेसीचें उपचारीक उक्तावण
भांगरभूंय । प्रतिनिधी
मुरगांवः भारतीय रेल्वेन गोंयांत सुदारीत रेल्वे सेवा सुरू केल्या. एलएचबी डब्यां सयत पयली रेलगाडी गोवा एक्सप्रेस वास्को द गामा रेल्वे स्टेशनाचेर उपचारीक उक्तावणा उपरांत सुरू केली.
कोचींग डेपो अधिकारी जी. शेख आनी वास्को स्टेशन वेवस्थापक विपुल कुमार यांचे हाजिरेंत वरिश्ठ विभागीय विद्युत अभियंते एच. विजयकुमार हांणी रेलगाडयेक पाचवो बावटो दाखयलो. पयली रेलगाडी ‘गोवा एक्सप्रेस’ लींक हॉफमन बुश डब्यां सयत वास्को रेल्वे स्टेशनाचेर सुरू केली.
आदीं वास्को रेल्वे स्टेशना वयल्यान दिल्ली वचपी गोवा एक्सप्रेस रेलगाडी आयसीएफ पद्दतीच्या डब्यांतल्यान व्हरताले. ह्या रेल्वे स्टेशनाचेर आदींचे गोवा एक्सप्रेस रेलगाडयेक 22 डबे आशिल्ले. तातूंत 1 टू टायर एसी, 4 थ्री टायर एसी, 9 स्पीपर कोच, 3 जनरल बगी, 2 पेंट्री, 2 पार्सल बोगी आनी 2 पॉवर (जनरेटराचे) डबे आसताले. तातूंतल्यान सुमार 984 प्रवाशांक व्हरपाची तांक आशिल्ली. आतां हे रेलगाडयेक 20 एलएचबी डबे आसतले. तातूंत 1 फर्स्ट क्लास एसी, 2 टू टायर एसी, 4 थ्री टायर एसी, 4 थ्री टायर इकॉनॉमीक एसी, 2 स्लीपर कोच, 2 जनरल बोगी, 2 एससीआर, 2 पेंट्री कोच आनी 2 पार्सल बोगी आसतले. हे गाडयेंत 848 प्रवाशी व्हरपाची तांक आसा.
रेल्वेच्या सुत्रांनी दिल्ले म्हायती प्रमाण गाडयो आदीं इंटिग्रल कोच फॅक्टरी बोगींक सुसज्ज आशिल्ल्यो, तांची सुवात आतां लींक ङॉफमन बूश बोगींनी घेतल्या.
गोंय ते हजरत निजामुद्दीन मजगतीं वचपी गोवा एक्सप्रेस वास्को रेल्वे स्टेशना वयल्यान सुरू केल्या. तातूंत एलएचबी कोचान बदलिल्ले सगळे डबे आसात. एलएचबी हें आधुनीक कोच आसात. तातूंत प्रवाशां खातीर टॉयलेटी पासून आसन वेवस्थे मेरेन अतिरिक्त सुदारीत सुविधा आसात, अशें सुत्रांनी म्हणलां.
एलएचबी कोच नव्या तंत्रज्ञानान सुसज्ज
एलएचबी कोच नव्या तंत्रज्ञानान सुसज्ज आसात आनी ते अदीक सोयीस्कर, सुसेग दिवपी आनी सुरक्षीत आसात. प्रवासा वेळार प्रवाशांक कसलोच धपको बसचो न्हय हे खातीर उच्च वेग सोंसपा खातीर गाडयेचे डबे डिझायन केल्यात. हे डबे अँटी- टेलिस्कोपीक’ डबे आसात, जे प्रवाशांची सुरक्षा कितलेशेच पटींनी वाडयतात. चड करून अपघाता वेळार डब्यांची रास आडावपा खातीर डिझायन केल्यात. बोगी लांबायेन व्हड आनी चड आवांताद आसात. ते प्रवाशांत लांब प्रवासांत थाकाय दितले, अशें रेल्वेच्या सुत्रांनी म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
