भांगरभूंय | प्रतिनिधी
खबरां संस्था
मुंबयः भारताचो स्टार फास्ट बॉलर जसप्रीत बुमराह बऱ्याच दिसां सावन भारतीय पंगडा भायर आसा. भारता वतीन तो निमणी मॅच सप्टेंबर 2022 वर्स ऑस्ट्रेलियेंत खेळल्लो. ह्या टी-20चे मॅचींत ताचे फाटीक दुखापत जाल्ली. ताच्या पुनरागमा विशीं एक गजाल सामकार आयल्या. तो वन-डे वर्ल्ड कपा पयलीं आयर्लंडा आडचे तीन टी-20 मॅचीचे माळेंत भारता वतीन खेळपाक शकता. वर्ल्ड कप अंदू ऑक्टोबर- नोव्हेंबर म्हयन्यांत जातली. भारताची मॅच ऑगस्टांत आयर्लंडा कडेन जातली.
फाटल्या मार्च म्हयन्यांत बुमराहाचेर शस्त्रक्रिया केल्ली. राष्ट्रीय क्रिकेट क्रिकेट अकादमींत ताच्या फिटनेसाचेर बरेच कश्ट घेतल्यात. न्यूज 18चे खबरे प्रमाण बुमराह ऑगस्टांत आयर्ल्ंडा आड सर्तीचे क्रिकेटींत पुनरागमन करपाची शक्यताय आसा. भारतीय क्रिकेटी खातीर ही बरीं चिन्हा आसात अशें बीसीसीआयच्या एका अधिकाऱ्यान सांगलें.
बुमराह एन सी ए मुखेली व्हीव्हीएस लक्ष्मण आनी नितीन पटेल हांचे देखरेखी खाला आसा. पटेल खेळां विज्ञान आनी वखदां विभागाचो मुखेली आसा. बुमराहाच्या पुनर्वसणुके खातीर एनसीएचो फिजिओ एस रजनीकांत ताचेर बारीकसाणेन लक्ष दवरून आसा. 29 वर्सां बुमराहान आतां मेरेन 30 टॅस्ट, 72 वन-डे आनी 60 टी-20 मॅची खेळ्ळा. टॅस्टींत ताणे 128, वन-डेंत 121 आनी टी-20त 70 विकेटी घेतल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
