भांगरभूंय | प्रतिनिधी
फास्ट बॉलर शाहीन आफ्रिदीचो फुडल्या म्हयन्यांत श्रीलंकेंत जावपी टॅस्ट माळे खातीर पाकिस्तानाच्या पंगडांत आस्पाव केलो. जाल्यार मोहम्मद हुरैरा आनी आमीर जमाल हांची पयले खेपे टॅस्ट पंगडांत निवड जाल्या. पाकिस्तान क्रिकेट मंडळान दक्षीण आफ्रिकेचो आदलो फास्ट बॉलर मोर्ने मोर्कलाची बॉलिंग प्रशिक्षक म्हणून नेमणूक केल्ल्याची घोशणा केली. ताणें पाकिस्तान क्रिकेट मंडळा कडेन स म्हयन्यां खातीर कबलात केल्या.
बाबर आजमाच्या फुडारपणाखाला 16 वांगड्यांचो पंगड दोन टॅस्टींची माळ खेळपाक श्रीलंकेंत वतलो. दावखुरो फास्ट बॉलर शाहीनाचें पुनरागमन पाकिस्ताना खातीर थाकाय दिवपी आसा. धोंपराचे दुखापतीक लागून पोरूं जुलय सावन ताणें एकूय टॅस्ट खेळूंक ना. ताका ही दुखापत श्रीलंके आड खेळटना जाल्ली. पाकिस्ताना वतीन ताणें आपली निमाणी मॅच ऑक्टोबरांत इंग्लंडा आड संवसारीक टी-20 क्रिकेट सर्तीचे फायनलींत खेळिल्ली.
शाहीनान 2018त टॅस्ट पदार्पण केल्लें. तांणी अजून मेरेन 99 विकेटी घेतल्यात. निवड समितीन चार फास्ट बॉलरांची, स तज्ञ बॅट्समनांची आनी दोन विकेटकीपर बॅट्समनांची निवड केल्या.
पंगड असोः बाबर आजम (मुखेली), मोहम्मद रिजवान, आमीर जमाल, अब्दुल्ला शफीक, अबरार अहमद, हसन अली, इमाम उल हक, मोहम्मद हुरैरा, मोहम्मद नवाज, नसीम शाह, नोमान अली, सलमान अली आगा, सरफराज अहमद, सऊद शकील, शाहीन आफ्रिदी आनी शान मसूद.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
