भांगरभूंय | प्रतिनिधी
वास्को स्पोर्ट्स क्लबाच्या गोवा रिव्हर मॅराथॉनाची अंदूंची 13वी आवृत्ती आसतली. 10 डिसेंबराक जावपी हे सर्तींत जे 42 किलोमिटराची पुर्ण मॅराथॉन पुराय करपाक शकना, पूण चड अंतर धांवपाक इत्सूक आसात तांचे खातीर 32 किलोमिटराची ‘धी 20 मायलर’ सर्त पयलेच खेपे घेतले अशी म्हायती पत्रकार परिशदेंत क्लबाचे अध्यक्ष नितीन बांदेकारान दिली.
गोवा रिव्हर मॅराथॉनाक अजून स म्हयन्यांचो कालावधी आसलो, तरी आतां सावन ते विशीं जागृती मोहीम सुरू केल्या. ताचोच एक भाग म्हणून आयरारा (18 जून) वेर्णें उद्दीगक वसाहतींत वेर्णें उद्देग संघटना आनी गोंय उद्देगीक उदरगत म्हामंडळ (जीआयडीसी) हांचे मजतीन सकाळीं 6 वरांचेर ‘प्रोमो रन’ घेतले. आनी तातूंत राज्यांतल्यान सुमार एक हजार हौशी धांवपी वांटो घेतले अशें बांदेकार हांणी मुखार सांगलें.
ह्या मॅराथॉना (42 किलोमीटर), अर्ध मॅराथॉन (21 किलोमिटर), 10 किलोमीटर, शालेय पंगडां खातीर 5 किलोमिटर सर्त आनी पयलेच खेपे सर्तींत वांटो घेवप्यां खातीर फाटले आवृत्ती प्रमाण 5 किलोमीटर फन ही सर्त आसतली.
10 किलोमिटराची ‘कॉर्पोरेट चॅलेंज’ सर्त लेगीत अंदूं पयलेच खेपे जातली. ‘धी 20 मायलर’ सर्त देशांतल्या मेजक्याच मॅराथॉनांनी आसता. तातूंत आतां गोवा रिव्हर मॅराथॉनाची भर पडटली अशें बांदेकारान मुखार म्हणलें.
पत्रकार परिशदेक गोवा रिव्हर मॅराथॉन सेगीत तिसऱ्या वर्सा पुरस्कृत करपी एसकेएफ इंडिया लिमिटेडाचे वेवस्थापकीय संचालक मनीष भटनागर, वास्को क्लबाचे सचीव राकेश उन्नी, भांडारी अभिजीत साळकार उपस्थीत आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
