सात्विक-चिराग जोडयेन घडयलो इतिहास

भांगरभूंय | प्रतिनिधी

इंडोनेशियाच्या जकार्ता शारांत चालू आशिल्ले इंडोनेशिया ओपनांत भारताचे सात्विक साईराज आनि चिराग शेट्टी हे जोडयेन इतिहास घडयलो. दादल्यांचे जोडयेन सुपर 1000 रॅटिंग सर्तीचे फायनलींत पावपी भारताची पयली जोडी थारली. सात्विक-चिराग हे जोडयेन दक्षीण कोरियाचे मिन ह्युक कांग आनी सेउंग जे सेओ हे जोडयेक 17-21, 21-19 आनी 21-18 अशा तीन गेमींनी हारयली.

सात्विक-चिरागाची जोडी दुसरे सेमी फायनलींत जिखपी इंडोनेशियाचे वा मलेशियाचे जोडये आड खेळटली.

कोरियाचे जोडयेन पयले गेमींत रोखडीच 6-3 अशी आघाडी घेतली. एकदा सात्विक आनी चिराग फाटीं पडल्या उपरांत तांकां कॅच-अप बॅडमिंटन खेळची पडली. भारताचे जोडयेन आक्रमक खेळ करीत स्कोर 15-19 आनी उपरांत 17-20 असो केलो. पूण, अखेरेक कांग आनी सेओ हांणी पयली गेम जिखली. राष्ट्रकूल खेळांत वस्तादपण जोडपी सात्विक-चिराग जोडयेन दुसरे गेमींत बरो खेळ केलो. तांणी जलद शॉर्ट्स आनी बॉडी स्मॅश सयत 6-3 आनी उपरांत 11-4 अशी जबरदस्त आघाडी घेतली.

सात्विक-चिराग हांकां कांय वायट लायन कॉल्स आयले. ताका लागून कोरियन जोडीचो फायदो जालो. भारताचे जोडयेन हार मानूंक ना आनी चेपणाखाला बरो खेळ करून दुसरी गेम जिखून मॅचींत 1-1 अशी बरोबरी सादली.

निर्णायक गेमींत पयल्या पांच गुणां मेरेन बरोबरी आशिल्ली. पूण, सात्विक आनी चिराग हांणी सेगीत सात गूण घेत 12-5 अशी आघाडी घेतली. कोरियन जोडयेन 16-16 अशी बरोबरी सादपाक नेटाचे यत्न केले. पूण, भारताचे जोडयेन फाटीं वळून पळोवंक ना आनी तिसरी गेम जिखून फायनलींतली आपली सुवात निश्चीत केली.

मजगतीं, दादल्यांच्या एकोड्या गटांत एच एस प्रणय सरळ गेमींत हारलो, हे हारीक लागून ताचें आव्हान सेमी फानयलींत सोंपलें. डॅनमार्काच्या विक्टर एक्सेलसनान प्रणयाचें आव्हान 21-15 आनी 21-15 अशा सरळ गेमींनी सोंपयलें.