भांगरभूंय | प्रतिनिधी
ज्येश्ठ पत्रकार संदेश प्रभुदेसाय हांच्या “खाणो खुणो नश्ट करुया” ह्या एका स्टॅण्ड पॉयण्टान मनांत विचारांचें द्वंद्व सुरू केलें. जुलमी राजवटींच्यो खाणो-खुणो नश्ट करपाचे खूबशे यत्न देशभरांत जाले, जायत आसात. संदेशभाईन सांगलां तांकां जाय, आमकां जाय तशे ते वैचारीक पातळीचेर मात जावंक नात.
जो मेरेन आमची विक्टीम मॅण्टालिटी आमी सांबाळपाक शकनात तो मेरेन घडये जावचेय बी नात. दरेके परिस्थितींत आमी स्वताक एक पिडेस्त आनी दुसऱ्याक आपले पिडेचो गुन्यांवकारी म्हूण पळोवंक लागल्यात. देखीक, जाका आरक्षण मेळना तो स्वताक आरक्षणाचो पिडेस्त, आनी जाका आरक्षण मेळटा ताका आपलो गुन्यांवकारी समजता. आमच्यो पिडा आमकां सतायतात, आनी त्या दुख्खांत बुडिल्ले आमी, आमच्यो प्रिविलेजीस आनी आमचे गुन्यांव मात विसरतात? जेन्ना दुसऱ्याची पिडा दिसतली तेन्नाच आमचें भाग्य आमकां दिसपाक लागत काय? आनी आपलें भाग्य दिसलें जाल्यार कोण आमकां सांगपाक शकतलो, पटोवपाक शकतलो, “आमचेर अन्याय जाता आनी आमी ताचो ध्वंसक रितीन विद्रोह करूंक जाय”? घडये आमी ताका सांगपाक शकतले, “बाबा, हे खेळ आतां चलचे नात, तुका आतां आमच्या काळजाक हात घालपाक नवे विशय सोदचे पडटले. गरिबी, उपासमार, हवामानांतलो बदल, लैंगीक हिंसाचार…?”
आमी म्हणटात, आमकां नाका अशें जाती- धर्माच्या रंगांनी रंगिल्लें, भेदभावान भरसल्लें राजकारण. पूण जें राजकारण समाजाक आवडटा, तेंच चलता. जें आवडना तें सोंपता. जगभरांत हाच्यो वेगवेगळ्यो देखी आमकां पळोवंक मेळटात. हिटलराक पयलीं सामको द्रश्टो आनी लोकप्रिय नेतो म्हणटाले. मागीर ताका fascist म्हणून वळखलो आनी हरयलो. पूण जे ब्रिटीशां भशेन, पुर्तुगेजां भशेन जातीयवाद, भेदाभेद आनी धर्माचें राजकारण करून फुडें सरतात, ते आजून सत्तेचेर आसात म्हणटकच, ते आनी तांचें राजकारण आमकां, आमच्या आयच्या समाजाक आवडटा, अशें जालें ना?
इतिहासांत जेन्ना जेन्ना कोणेंय, कसल्याय कारणाक लागून, लोकांचीं धर्मस्थळां, प्रार्थनास्थळां, समाजीक सुवातो, संस्कृतायो, विद्यापिठां, ग्रंथालयां, ध्वस्त केलीं, तेन्ना तेन्ना त्या त्या समाजांचेर – सदांकाळ उरपी भंय, असुरक्षीतताय आनी आघात निर्माण जाले. अशे ट्रौमा पिळग्यान पिळग्यो त्या समाजांच्या लोकांच्या मनां भितर उरल्यात, अजून उरल्यात. आमी फुडाराकय आमच्या समाजांत, आमचे विविधतायेन नटिल्ले भारतीय संस्कृतायेंत अशे आघात, अशे ट्रॉमा निर्माण करपाक सोदतात काय? आमी सूड आनी बदल्याची भावना वापरून राजकारण करत रावले जाल्यार, आघाताचो प्रतिसाद आघातान दीत रावले जाल्यार, आमी केन्नाच एक मानसीक रितीन सुरक्षीत समाज घडोवंक पावचे नात. आमकां आमचेर आनी हेरांचेर जाल्ले आघात आनी भंय पयस करूंक जाय, सुरक्षीतताय हाडूंक जाय, जाल्यार सगळ्यांत पयलीं आमचो इतिहास आमकां आसा तसो मान्य करचो पडटलो, स्विकारचो पडटलो. वस्तुनिश्ठपणान. आनी मागीर, त्या इतिहासाक माफ करचें पडटलें, कोणेंच चूक मागिल्ली
नासतना.
स्वता खातीर, फुडारा खातीर, एकमेकांक आपणावचें पडटलें. आनी त्या उपरांत जे आमकां आमचो इतिहास परत परत जगोवंक सोदतात, तांचें अशें करपा फाटलें उद्दिश्ट किदें? हाचो विचार करुनूच फुडली वाट थारोवची पडटली. आमचो इतिहास काय आमी बदलूंक शकनात. फुडार मात आयज घडटा. तो
सांबाळुया?
अंतरा भिडे
7506739360
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
