भांगरभूंय | प्रतिनिधी
काळखांत सुद्दां दिसतलें, अशे तरेचे सुचोवणी फलक लावपाची सक्ती करपाक जाय. रातचे वेळार पुलीस वा सुरक्षा रक्षकाची वेवस्था आसपाक जाय.
फांटले पाच म्हयने स्मार्ट सिटीच्या कामाक लागून राजपाटण पणजेची स्थिती सामकी बाबत जाल्ली. आतां कामां पुराय जायत आयल्यांत. रस्त्यांचेर डांबर पडिल्ल्यान गाडयो चलोवपाक मेळटात. देखून पणजे सदांच कामाक येवपी लोकांक बऱ्याच प्रमाणांत थाकाय मेळ्ळ्या. स्मार्ट सिटीची कामां चलतना पणजे बारीक- मोठे अपघात जाले. तातूंत कोणाक मरण येवंक ना, हे तांतल्या तांतुंत समाधान. रस्तो सकयल वचून टॅंकर मुंगरपाचे बरेच प्रकार जाले. सांतिनेज जंक्शन, काकुलो मॉल हांगाच्या रस्त्यांची स्थिती तर सामकी बाबत आशिल्ली. येरादारीची कोयंडी सदांच सांज वेळार जाताली. दुचाकीवाल्यांचें हाल जाल्यार उतरांनी उक्तावप कठीण. मॉन्सून राज्यांत पावलो, तरी आजून पावसाचो पत्तो ना. पावस नाशिल्ल्यान लोकांक गर्मेचो त्रास जावपाक लागला. बियाणें रोंवपा खातीर शेतकार पावसाची वाट पळयतात. पावस नाशिल्ल्यान स्मार्ट सीटीचें काम करपी कंत्राटदारांक मात थाकाय मेळ्ळ्या. पावसाची आडखळ नाशिल्ल्यान तांकां कामाची गती वाडोवप शक्य जालें. जुनांत पावस सुरू जाल्लो जाल्यार पणजे गाडी चलोवप धोक्याचें थारतलें आशिल्ले. हाका लागून पणजे सदां येवपी आनी पणजेकारांनी पावसाचे उपकार मानपाक जाय.
स्मार्ट सिटीच्या कामाक लागून लोकांची गैरसोय जाली. ताची खंडपीठान सुद्दां दखल घेतल्या. येरादारी, पर्यटन, भौशिक बांदकाम खात्यांक नोटीस जारी केल्या. येरादारी सचिवांक प्रतिज्ञापत्र सादर करपाचे निर्देश दिल्यात. फाटलीं बरींच वर्सां राज्यांत सगळे कडेन रस्त्यांची कामां जालीं. पणजी, म्हापशें, फोंडें, मडगांव ह्या शारां सयत हेर शारांनी सुद्दा रस्त्यांचें रूंदीकरण तशेंच हॉटमिक्स करपाचीं कामां सुरू आशिल्लीं. येरादारी सुरळीत जावपा खातीर थारावीक काळांत रस्त्यांचीं कामां जावपाकूच जाय. हीं कामां बांदकाम खाते कंत्राटदारां वरवीं करता. कामां चलतना जी जतनाय घेवपाक जाय, ती कोण घेनात. रस्त्याचें काम चलता, ते सुवातेर येरादारीची कोयंडी जाता. काम चलता तेन्ना कंत्राटदार, बांदकाम खातें आनी येरादारी पुलिसां कडल्यान खबरदारीच्यो उपाय- येवजण्यो करपाची गरज आसा. सुचोवणी फलक लावपा सयत येरादारी वेवस्थापना खातीर पुलिसांची मजत घेवपाक जाय. बरेच वेळार सुचोवणी फलक आसनात. पुलीस नाशिल्ले कारणान येरादारीची कोयंडी जाता. काम करता आसतना फावो ते उपाय घेवपाची जापसालदारी कंत्राटदाराचेर घालपाक जाय. जे कंत्राटदार रस्त्यांचीं कामां करतना सुरक्षेचे उपाय करीनात वा फावो ती जतनाय घेनात, तांचेर कारवाय करपाची गरज आसा. निविदा जारी करतना कंत्राटदाराक अटी घालून दिल्ल्यो आसतात. तांचें पालन जायना. आयज मेरेन एकाय कंत्राटदाराचेर कारवाय जाल्ली ना. निविदा अचकीत रद्द केली वा पयशें मेळ्ळे नात, जाल्यार कंत्राटदार मात न्यायालयात गेल्ले आसात.
केंद्रांत नरेंद्र मोदी हांचे फुडारपणा खाला भाजपाचे सरकार सत्तेर येवन आता णव वर्सां पुराय जाल्यांत. केंद्रांत नितीन गडकरी हे रस्ते आनी म्हामार्ग मंत्री जाले आनी रस्त्यांचो कायापालट जावपाक लागलो. नवे रस्ते तयार जावपा सयत पोरणें रस्ते रूंद जावपाक लागले. गोंयचो विचार केलो जाल्यार म्हामार्गाचो नक्सोच बदलून गेलो. मांडवी न्हंयेचेर अटल सेतू हो तिसरो पूल तयार जालो. बांबोळी फ्लायओव्हरा सयत जुवारी न्हंयेचेर नवो चौपदरी पूल तयार जालो. पत्रादेवी ते पोळें मेरेनच्या म्हामार्गाचे रूंदीकरण सुरू आसा. म्हापसा ते पणजे मेरेन रूंदीकरण पुराय जालां. आता ह्या म्हामार्गा वेल्यान गाडी चलयतना उमेद दिसता, पूण काम चलतालें तेन्ना जावपी त्रास चडश्या गोंयकारांनी भोगल्यात. म्हामर्गा रूंदीकरणाचें काम चलतना गिरी, म्हापसा चार रस्तो, पर्वरी हांगा बरेच अपघात जाल्यात. कांय येरादारीच्या गैर वेवस्थापना खातीर. हे अपघात तशेंच उपाय येवजणेंचेर विधानसभेंत चर्चा जाल्या. ह्या अपघातांतल्यान कोणेच धडो घेवंक ना. सध्या मोपा लिंक रस्त्याचें नेटान काम सुरू आसा. हें काम सुरू आसतना सुकेंकुळण हांगां अपघात जावन एकल्याक मरण आयलें. अपघातात सापडिल्लो ट्रक हो मोपा लिंक रस्त्याचें काम करतालो. हो अपघात भिरांकुळ आशिल्लो. अपघाताक लागून चाळवल्ल्या लोकांनी दोन क्रेनींक उजो घालो. हाचे पयली हेच सुवातेचेर अपघात जाल्यात. लोकांनी कंत्राटदार कंपनीचेर तिडक काडली. ह्या अपघाताक कारण कोण? दोश कोणाचो? हें चवकशे उपरांत स्पश्ट जातलें. कामाच्या थळाचेर सुरक्षेची उपाय येवजण नाशिल्ली, हें स्थिती पळयल्यार लक्षांत येता. कंत्राटदार कंपनीन लुकसाण भरपाय दिवची , अशी मागणी जमावान केल्या. कंत्राटदार कामाचे पयशे घेतात. पयश्या प्रमाण काम मात दर्जेदार जायना. तशेंच काम करतना लोकांची गैरसोय वा अपघात जाता, ताची जापसालदारी घेनात. हो विशय बरोच गंभीर आसा. आता पावस सुरू जाला. पावसांत म्हामार्गाची कामां चड धोकादायक थारतात. रातचे वेळार रस्त्याची एक कड खणिल्ली आसता. कांय कडेन खडी आसता. दिवे वा फिक्चर्स नाशिल्ल्यान वाहनचालकाक रस्त्याचो अदमास येना आनी अपघात जाता. काळखात सुद्दा दिसतले, अशें तरेचे सुचोवणी फलक लावपाची सक्ती करपाक जाय. रातचे वेळार पुलीस वा सुरक्षा रक्षकाची वेवस्था आसपाक जाय. सरकारान विचार करचो. रस्त्याचेर साचपी उदकाक लागून चिखल जावचो ना, म्हूण उपाय करपाची गरज आसा. हे सगळे कंत्राटदाराक करप शक्य ना. बांदकाम खाते, पुलीस आनी कंत्राटदारान योग्य तरेन नियोजन करपाक जाय.
कंत्राटदाराचेर कोणाचोच वचक आसना. काम करतना सुरक्षेच्या उपायांक प्राधान्य दिवपाची गरज आसा, तें जायना. रस्तो सुरक्षा तशेच येरादारी वेवस्थापना कडेन आडनदर करपी कंत्राटदारांचेर कारवाय जावंक जाय. कंत्राटदारांचेर वचक जाय, हे सुकेंकुळण अपघातांन सिद्ध जालां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
