भांगरभूंय | प्रतिनिधी
नजमूल हुसैन शांतो (124) हाच्या आकर्शक शेंकड्या उपरांत मोमिनुल हक (नाबाद 121) आनी मुखेली लिटन दास (नाबाद 66) हांचे मदी नाबाद 143 धांवड्यांचे भागिदारी नेटार बांगलादेशान एकोडे टॅस्ट मॅचींतलो दुसरो डाव 4 विकेटी वगडावन 425 धांवड्यांचेर घोशीत केलो आनी अफगाणिस्तानाक जैता खातीर 662 धांवड्यांची मोख दिली.
तिसऱ्या दिसाचो खेळ सोंपलो त्या वेळार अफगाणिस्तानान 2 विकेटी वगडावन 45 धांवड्यो करून संघर्श करतालो. अफगाणिस्तानाक जैता खातीर अजून 617 धांवड्यांची गरज आसा. जाल्यार बांगलादेशाक जैता खातीर आठ विकेटी जाय.
मजगतीं, काल सकाळीं जाकिर हसनाच्या (71) रुपान बांगलादेशाक पयलो धपको बसलो. पूण, ते उपरांत शांतोन कारकिर्दींतलो दुसरो शेंकडो पुर्ण केलो. ताणें 151 बॉलांनी 15 चवके मारले. चवथी विकेट मुशफिकर रहिमाच्या (8) रुपान पडली. उपरांत लिटन दास आनी मोमिनुल हक हांणी तिसऱ्या सत्रांत पंगडाचो स्कोर 425 मेरेन पावयलो आनी डाव घोशीत केलो.
अफगाणिस्तानाची सुरवात बरी जाली ना. ओपनर इब्राहिम जदरान (0) डावाच्या पयल्याच बॉलाचेर एलबीडब्यू बाद जालो. ह्या धपक्या उपरांत अफगाणिस्तानाक आनीक एक धपको बसलो. तस्किन अहमदान अब्दुल मलिकाक (5) बाद केलो. ते उपरांत हसमतुल्लाह शाईदी 13 धांवड्यांचेर रिटायर्ड हर्ट जालो. ते उपरांत रहमत शाह (10) आनी नासिर जमाल (5) आपल्या पंगडाक आनीक धपके बसपाक दिले नात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
