भांगरभूंय | प्रतिनिधी
मुखेली आनी अणभवी मिडफिल्डर लुका मॉड्रिचान अतिरिक्त वेळांत पॅनल्टीचेर केल्ल्या गोलाच्या नेटार क्रोएशियान नॅदरलॅण्डाक 4-2 अशा गोल फरकांनी हारोवन नॅशन्स लीग फुटबॉलाचे फायनलींत सुवात मेळयली.
37 वर्सां पिरायेच्या मॉड्रिचाची कामगिरी क्रोएशिया खातीर निर्णायक थारली. देशा वतीन 165वी मॅच खेळपी मॉड्रिचान एक गोल केलो आनी एक गोल करपाक मजत केली. मॅची उपरांत नॅदरलॅण्डाचो प्रशिक्षक रोनाल्ड कुमन हांणी लेगीत मॉड्रिचाची तोखणाय केली.
आपूण जें कितें उलयता तें घडये योग्य थारचें ना. पूण, केन्ना केन्ना प्रतिस्पर्धी पंगडांक असो एक खेळगडो आसता. तो निर्णायक कामगिरी करता. अशा खेळगड्याचो खेळ पळयतना मजा येता अशें कुमनान म्हणलें.
मॉड्रिचच्या फुडारपणाखाला क्रोएशियान 2018चे संवसारीक फुटबॉल सर्तींत उपवस्तादपण जोडिल्लें. जाल्यार पोरूं कतारांत जाल्ले सर्तींत क्रोएशियाक तिसरी सुवात फावो जाल्ली. आतां मॉड्रिच आनी क्रोएशिया हांकां नेशन्स लिगेचें वस्तादपण जोडपाची संद आसा.
नॅदरलॅण्ड आनी क्रोएशिया हांचे मदली मॅच उमळशीक वाडोवपी थारली. 34व्या मिनटाक डॉनयेल मालेन हाणें केल्ल्या गोला नेटार नॅदरलॅण्डान आघाडी घेतली. पूण, उत्तरार्धात आंद्रे क्रॅमरीचान 55व्या मिनटाक आनी मारियो पासालिचान 72व्या मिनटाक गोल करून क्रोएशियाक 2-1 अशी आघाडी मेळोवन दिली. क्रोएशिया नियमीत वेळांत मॅच जिखतलो अशें दिशिल्लें. पूण, 90 मिनटां उपरांतच्या भरपाय वेळांत नोआ लॅन्ग हाणें गोल करून नॅदरलॅण्डाक 2-2 अशी बरोबरी मेळोवन दिली. ताका लागून 30 मिनटांचो अतिरिक्त वेळाचो खेळ जालो. हातूंत 98व्या मिनटाक ब्रुनो पेट्कोविच आनी 116व्या मिनटाक मॉड्रिचान गोल करून क्रोएशियाक जैत मेळोवन दिलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
