जमीन हडप करपाचो यत्न करचो न्हय

भांगरभूंय | प्रतिनिधी

मुख्यमंत्री डॉ. प्रमोद सावंतः मयेंच्या 350 भुंयपुतांक सनदी वितरीत, सगळो आदार दिवपाची हमी

भांगरभूंय । प्रतिनिधी

दिवचलः मयेंच्या लोकांक तांचे हक्क दिवपा खातीर यत्न चल्ल्यात सगळ्या लाबार्थींक सनदी मेळटल्यो, तशेंच हेर येवजण्यांचोय लाव मेळोवन दितले. तांणी हुस्क्या मेकळें रावचे. मयेंच्या लोकांचेर कसलोच अन्याय जावपाक दिवचे नात. पूण कोणेच बेकायदो जमीन हडप करपाचो यत्न करचो न्हय, अशें मुख्यमंत्री डॉ. प्रमोद सावंत हांणी सांगलें.

मयेंचे आमदार प्रेमेंद्र शेट हांच्या वाडदिसाचे आदले सांजेर मयेंच्या 350 भुंयपुतांक सनदी दिल्यो. ह्या वेळार मुख्यमंत्री डॉ. सावंत उलयताले. ह्या वेळार माचयेर केंद्रीय मंत्री श्रीपाद नायक, आमदार प्रेमेंद्र शेट, शंकर चोडणकार, महेश सावंत, उपजिल्होधिकारी रोहन कासकार, मामलेदार राजाराम परब, मयें कृती समितीचे अध्यक्ष सखाराम पेडणेंकार, प्रेमानंद म्हांबरे, आरती बांदोडकार, गट अध्यक्ष दयानंद कारबोटकार, सरपंच सुवर्णा चोडणकार आनी हेर पंच, सरपंच हाजीर आशिल्ले.

सरकारा आड कोणूय वता जाल्यार मयेंकारां खातीर सरकार सर्वोच्च न्यायालया मेरेन लडो दितले, अशी हमी मुख्यमंत्री डॉ. सावंत हांणी ह्या वेळार दिली.

आदले मुख्यमंत्री मनोहर पर्रीकार, आदले आमदार अनंत शेट हांणी कायदो केलो आनी आमी ताची फाटपुरवण केली. शेत जमनीय लोकांक दिवपाचो विचार आसा. शेती खातीर सरकाराच्यो सगळ्यो येवजण्यो मेळटल्यो, अशें मुख्यमंत्री डॉ. सावंत हांणी सांगलें. तशेंच भिवपाची गरज ना अशी हमी मयेंकाराक दिली. तेचवरी प्रेमेंद्र शेट हांकां वाडदिसाचीं परबीं भेटयलीं.

मयेंकारांनी हक्का खातीर व्हड लडो दिलो. तातूंत खूब जाणांचें योगदान आसा. मनोहर पर्रीकार, मयें कृती समिती हांणी वावर केला. डॉ. प्रमोद सावंत हांणी ताचेर कळस चडयलो. भाजपान ह्या प्रस्नांत विशेश यत्न करतना मयेंकारांक न्याय दिवपाचो प्रामाणीक यत्न केले. उरिल्लें कामूय भाजपा निश्चीतपणान पुराय करतलो, अशें केंद्रीय मंत्री श्रीपाद नायक हांणी सांगलें.

प्रेमेंद्र शेट हांणी वर्सभरांत बरें काम केलें ते खातीर केंद्रीय मंत्री नायक हांणी तांचें कवतूक केलें. उदरगतींत समाजाचो वांटो आसत जाल्यार ताका म्हत्व आसा. अजून कोयराची समस्या आसा. सगळ्यांनी एकवटान आदार करचो, असो तांणी उलो मारलो.

मुख्यमंत्री डॉ. सावंत हांच्या मार्गदर्शना खाला खूबश्यो येवजण्यो चालीक लायल्यो आनी राज्याची सर्वांगी उदरगत केली. मयेंचो प्रस्नूय सुटसुटीत तरेन सोडयलो. मयें हो मयेंकारांचो, ताचेर कोणाचोच अधिकार ना. मयेंकारां खातीर आमी  बांदील आसात, अशें आमदार प्रेमेंद्र शेट हांणी सांगलें.

शंकर चोडणकार हांणी येवकार दिलो. ह्या वेळार नारायण नार्वेंकार, अल्वीस फर्नांडीस हांणी मालमत्ता प्रस्नाचो नियाळ घेतलो. मयें कृती समितीचे सखाराम पेडणेंकार हांणी मार्गदर्शन केलें. उपजिल्होधिकारी रोहन कासकार हांणी सनद प्रक्रियेची म्हायती दिली. ह्या वेळार विवीध उपक्रमांचो शुभारंभ मानेस्तां हस्तुकीं केलो.

कायदो हातांत घेवचो न्हयः मुख्यमंत्री

सरकाराची जमीन गरजेभायर ताब्यांत घेवची न्हय. कायदो केले उपरांत जर कोणूय जमीन विकून घर बांदता जाल्यार तीं घरां बेकायदो थारावन मोडटले, कोणेच सरकाराक गृहीत धरपाचो यत्न करचो न्हय, अशीय मुख्यमंत्र्यान शिटकावणी दिली. मयां जी उरिल्ली सुवात आसा थंय सरकार व्हड प्रकल्प उबारतलें. ताचो फायदो मयेंच्या लोकांक मेळोवन दितले. सरकार लोकांक सगळे तरेची मजत करता, पूण बेकायदो जमनी आडावन ती विकून घरां बांदल्यात जाल्यार ताचो अहवाल घेतला. सरकार हीं बेकायदो घरां मोडटले, कोणेच कायदो हातांत घेवपाचो यत्न करचो न्हय. मयेंच्या लोकांचो सांबाळ करपाची सगळी खबरदारी घेतले, अशें मुख्यमंत्री डॉ. प्रमोद सावंत हांणी सांगलें.