भांगरभूंय | प्रतिनिधी
भांगरभूंय । प्रतिनिधी
पर्वरीः सिनेमाची लोकप्रियता कितले लोक तो पळयतात हाचेर निंबून आसता. कोंकणी सिनेमा पळोवपी लोक कमी आसात. तो तयार करपा खातीर केल्लो खर्च भरून येना म्हणून उण्या खर्चांत हे सिनेमा तयार करचे पडटात. दरेका गोंयकारान कोंकणी सिनेमा पळोवन सिनेमाची निर्मणी करतल्यांक उर्बां दिवपाक जाय. गोंयकारांचो आनी सरकाराचो तेंको मेळ्या बगर व्हडा प्रमाणांत कोंकणी सिनेमा निर्मणी करप शक्य ना अशें नामनचो तियात्रीस्त आनी आदलो सभापती तोमाझीन कार्दोज हांणी सांगलें.
थॉमस स्टिफन्स कोंकणी केंद्रांन पर्वरी हांगा आयोजीत केल्ल्या ‘आमचें नोशीब’ ह्या कोंकणीतल्या पयल्या सिनेमाच्या हिरक महोत्सवांत ते उलयताले. ह्या वेळार अभिनेत्री डॉ मिनाश्री मार्टिन्स, सिने निर्मातो राजेंद्र तालक, डॉ नंदकुमार कामत, मायकल ग्रासियश आनी इरेना कार्दोज हाजीर आशिल्ली.
सिनेमा निर्मणी व्हो एक धोक्याचो वेवसाय. ताका लागून कोंकणी सिनेमांत पयशे घालपाक चडशे कोणूय तयार आसानात. गोंयचे कलाकार कश्ट करपी न्हय आनी तांचे मदीं समर्पण ना. पटकथा हो सिनेमाचो सगळ्यांत कठीण भाग. ‘आमचें नोशीब’ सिनेमाची पटकथा तितली बरी नाशिल्ली. ताचे तुळेंत ‘निर्मोण’ कोंकणी सिनेमाची पटकथा खूब बरी आशिल्ली. आतां कोंकणी सिनेमाचें निर्मणी मोल बरेंच वाडलां अशें राजेंद्र तालक हांणे सांगलें.
गोंय सरकारा कडेन व्हिज्युअल एन्थ्रोपोलॉजीचो आर्काइव्ह ना .तो तरणाटे पिळगे खातीर म्हत्वाचो आसा.कोंकणी सिनेमा निरपराधी गोंय आनी निरपराधी गोंयकारांचें मुखामळ दाखयतात. शिक्षण खात्यान 9वे यत्ते पसून म्हाविद्यालय पांवड्या मेरेनच्या विद्यार्थ्यांक ‘आमचें नोशीब’ सिनेमा दाखोवपाची वेवस्था करपाक जाय. ताका लागून तांकां 60 वर्सां आदीं गोंय कशें आशिल्लें तें पळोवपाक मेळटले. राज्य सरकारान कोंकणी सिनेमांच्या 75 वर्सांच्या प्रवासाचें निरिक्षण आनी अभ्यास करपा खातीर राज्य पांवड्यावेली समिती तयार करपाक जाय असें डॉ नंदकुमार कामत हाणे सांगलें.
गोंयांत बऱ्या कलाकारांचो उणाव आसा. सिने निर्मणी करतल्याक कोंकणी सिनेमांत काम करपा खातीर बरे कलाकार मेळप कुस्तार जाता. ताका लागून अभिनयाचें प्रशिक्षण दिवपी संस्था गोंयांत स्थापन करपाची गरज आसा, अशें डॉ मिनाक्षी मार्टिन्सान सांगलें. इरेना कार्दोज, मायकल ग्रासियश आनी अभिनेतो सायरिको डायस हांची ह्या वेळार उलोवपां जाली. सायरिको डासय हाणे आमचें नोशीब सिनेमात काम केल्लें. तोमाझीन कार्दोज हांचे हस्तुकीं ताचो भोवमान केलो. सुरवेक थॉमस स्टिफन्स कोंकणी केंद्राचो संचालक डॉ पांडुरंग फळदेसाय हाणे सगल्यांक येवकार दिलो. सिद्धी गांवकारान सूत्रसंचालन केलें आनी फादर जुझे सिल्वेरा हांणी निमाणे सगल्यांचे उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
