संकेत नायक हांच्या पुस्तकाचें आयज प्रकाशन

भांगरभूंय | प्रतिनिधी

केरी-सत्तरी: उपक्रमशील शिक्षक आनी सायकल चलोवपी संकेत सुरेश नायक हांच्या ’एक पॅडल आनंदासाठी’ ह्या पुस्तकाचो प्रकाशन सुवाळो शेनवार, ता. 17 जुनाक दनपरां 3.30 वरांचेर साखळेच्या सरकारी कला, विज्ञान आनी वाणिज्य म्हाविद्यालयांत जातलो. 

ह्या सुवाळ्याक मुखेल सोयरे म्हणून वन्यजीव अभ्यासक पराग रांगणेकार, कार्यावळ अध्यक्ष म्हणून गोवा मराठी अकादमीचे अध्यक्ष प्रा. अनील सामंत, मुखेल वक्ते लोकसाहीत्य अभ्यासक प्रा. पौर्णिमा केरकार तशेंच खासा आमंत्रीत सांखळे कॉलेजीचे प्राचार्य डॉ. जर्वासिओ मेंडीस हाजीर रावतले. तशेंच विवेकानंद पर्यावरण जागृती फौजचे उपाध्यक्ष संगम पाटील, ज्येष्ठ पर्यावरण मोगी राजेंद्र केरकार आनी पुस्तकाचे लेखक संकेत नायक हाजीर आसतले. 

केरीच्या विवेकानंद पर्यावरण जागृती फौज वतीन हे कार्यावळीचें आयोजन केलां. 

विवेकानंद पर्यावरण जागृती फौजचे कार्यकर्ते आशिल्ले संकेत नायक हांणी पर्यावरण शिक्षण, जागृती आनी संवर्धन मळार बरें काम केलां. ताका लागून तांकां राज्य जैवविविधता पुरस्कार फावो जाला. 

संकेत नायक हे पुनर्वसन साळ हांगच्या सरकारी मुळाव्या विद्यालायांत विद्यादानाचें काम करता. तांच्या यत्नांक लागून विद्यालयांतल्या विद्यार्थ्यांचो आंकडो पांच वर्सांनी 15 वेल्यान 75 चेर पावला.