भांगरभूंय | प्रतिनिधी
हरमल: भारत सरकारच्या जनभागधारी उपक्रमा खाला राष्ट्रीय शिक्षणीक धोरण 2020 ची जापसालदारकी आनी जी 20 संकल्पना ह्या दोन म्हत्वाच्या विशयांचेर मांद्रें सप्तेश्वर उच्च माध्यमीक विद्यालयांत व्याख्यान आयोजीत केल्लें. ह्या व्याख्यानाक मुखेल सोयरे म्हणून मांद्रें सप्तेश्वर उच्च माध्यमिकचे समुपदेशक प्रा. स्टेफनी फेर्नांडीस हाजीर आशिल्ली.
मांद्रें उच्च माध्यमीक विद्यालयाच्या सभाघरांत व्याख्यान जालें. भारत सरकाराचो जनभगिधारी उपक्रम आनी जी 20 चें विद्यार्थ्यांक म्हत्व कळचें तशेंच संवसारांतल्या 20 देशांचें योगदान कितें आसता, आमच्या देशाची अर्थीक परिस्थिती घटमूट जावपा खातीर देशाचे कसले तरेचें योगदान आसता, जीडीपी म्हळ्यार कितें, जी 20 म्हळ्यार कितें हाची म्हायती स्टेफनी फेर्नांडीस हांणी विद्यार्थ्यांक दिली.
केंद्र सरकाराचें नवें शिक्षणीक धोरण काळाची गरज आसा. भुरग्यांक पुस्तकी शिक्षणा परस अणभवांतल्यान आनी खेळांतल्यान शिक्षणाचे धडे दिवचे. तांकां शिक्षणाची आवड, गोडी निर्माण जावची, तांचो शाळे विशीं भंय पयस जावचो ह्या खुबश्या गजालीं खातीर धोरण म्हत्वाचें, ह्या विशयांचेर फेर्नांडीस हांणी विचार मांडले.
मांद्रें कॉलेजीचे प्राचार्य तुषार अणवेकार हांणी उच्च शिक्षण धोरणाचेर म्हायती दिली. सुरवातेक प्रा. मेघना पोटे हांणी येवकार आनी प्रास्तावीक केलें. उपकार प्रभारी प्राचार्य सीताराम अश्वेकार हांणी मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
