भांगरभूंय | प्रतिनिधी
पणजी: पारांपय-मडकय हांगा हालींच परंपय दहाजाण समाजाच्या सभामंडपांत फुकट भलायकी तपासणी आनी दोळे तपासणी शिबीर आयोजीत केल्लें. हो कॅम्प ‘काळजी’ हे संस्थेन श्री कामाक्षी होमिओपॅथी मॅडिकल कॉलेज आनी हॉस्पिटल, शिरोडें गोंय आनी मातोश्री सेवाधाम भलायकी सेवा ट्रस्ट, मुंबय हांच्या जोड पलवान आयोजीत केल्लो. पारांपय वाठाराचे आनी मडकय ग्रामपंचायतीचे पंच वांगडी विनोद नायक हांच्या सहकार्यान हें शिबीर येसस्वी जालें.
ह्या वेळार मुखेल सोयरे ह्या नात्यान विनोद नायक हे हाजीर आशिल्ले. तशेंच समाजसेवक हरिश्चंद्र नायक, श्री नवदुर्गा प्रकटोत्सव मंडळाचे अध्यक्ष जयकृश्ण नायक, भलायकी तपासणी खातीर आयिल्ले होमिओपॅथी डॉ. विशाल कुबल आनी दोळ्यांचे डॉ. अरूण कुमार पटेल ह्या वेळार हाजीर आशिल्ले. तशेंच ‘काळजी’ हे संस्थेचे मुखेली श्रृंगार रघुवीर नायक आनी हेर मानेस्त हाजीर आशिल्ले.
कोवीड काळा पसून आतां मेरेन मनशाच्या बर्या खातीर काम करपी, तशेंच आतां हें पारांपय वाठारांत शिबीर घडोवन हाडिल्ले खातीर विनोद नायक हांणी ‘काळजी’ हे संस्थेक परबीं भेटोवन ताची तोखणाय केली.
ह्या वेळार जयकृष्ण नायक, हरिश्चंद्र नायक हांणी आपले विचार मांडले. एका दिसाच्या ह्या भलायकी तपासणी शिबिराक सुमार शंबरां परस चड दुयेंतीनी वांटो घेतलो. डॉक्टर आनी हेर कर्मचारी मेळून सुमार 25 जाणांचो पंगड ह्या शिबिरांत लोकांचे सेवे खातीर उपलब्ध आशिल्लो.
हे कार्यावळीचें सुत्रसंचालन श्वेता सुरज नायक हांणी केलें. समीर नायक हांणी उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
