भांगरभूंय | प्रतिनिधी
कोंकणी भक्तिगीतांचो ट्रेंड लोकप्रीय: दिगंबर कामत
पणजी: विधानसभा वांगडी दिगंबर कामत हांणी नामनेचे कोंकणी गीतकार जॉन आगियार हांणी बरयल्ल्या ‘कामाक्षी माते तुजो जय जयकर’ ह्या नव्या कोंकणी भक्ती गीताचें प्रकाशन पर्वरी विधानसभा संकुलांत जालें. दिगंबर कामत हांच्या दालनांत एके सादे कार्यावळींत कॉपरलीफ/ विश्वमुक्त समुहाचे अध्यक्ष श्रीकांत पै बीर, मंगुरीश पै रायकार आनी संचीन पै बीर हांचे हाजेरींत ह्या भक्तीगीताचें लोकार्पण जालें.
ह्या वेळार कामत हांणी भक्तीगीतां बरोवपाच्या आगियार हांच्या यत्नांची तोखणाय केली. एका काळार मराठींत हिंदू भक्तिगीतां आशिल्लीं. पूण आतां कोंकणी भक्तिगीतांचो ट्रेंड लोकप्रीय आसा. ह्या ट्रेंडांत मुखेल भुमिका केल्ले आनी योगदान दिल्ले खातीर तांणी आगियार हांणी तोखणाय केली.
श्रीकांत पै बीर हांणी गीतांचें संगीत आनी बोल हांची तोखणाय केली.
मंगुरीश पै रायकार हांणी कलाकारांची तोखणाय केली आनी भक्तीगीत लोकांक विशेश म्हळ्यार देवी कामाक्षीच्या भक्तांक आवडटलें अशी आस्त तांणी उक्तायली.
गायक अक्षय नायक हांणी सगळीं कोंकणी भक्तिगीतां रचपांच धन्यताय मानली.
जॉन आगियार हांणी, भक्तीगीतांतल्यान सकारात्मक उर्बा मेळटली अशी आस्त आसा. हीं गीतां लोकांक एकठांय आनी देवाच्या लागीं हाडटात. हें गीत लोकांक आवडटलें अशी आस्त तांणी उक्तायली. दिल्ल्या फाटबळा खातीर तांणी कॉपरलीफचे उपकार मानले.
हें गीत नामनेचे गायक अक्षय नायक हांणी गायलां. संगीताची रचणूक/वेवस्थापन नायक हांणी स्वता केल्या. उपरांत तें गीत श्री महालसा रेकॉर्डींग स्टुडिओ, सावयवेर्यां रेकॉर्ड केलें. डीओपी/एडिटींग/कॅमेरा आनी ड्रोन पायलटींग आय क्लिकचे उद्धव केरकार हांणी केलां.
4.12 मिनटांचो हो व्हिडिओ श्री कामाक्षी देवस्थान आनी तळ्यार शूट केला. हो व्हिडिओ गोञयचे नामनेचें रेस्टॉरंट कॉपरलीफान प्रायोजीत केलां. जॉन आगियार हांच्या युट्यूब चॅनेलवर म्युजीक व्हिडिओ अपलोड केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
