भांगरभूंय | प्रतिनिधी
पर्यटन मंत्री रोहन खंवटे हांचें युवा पर्यटन क्लबाचे बसकेक मार्गदर्शन
पणजी: गोंयच्या पर्यटन मळाक मुखार व्हरपा खातीर नवी कल्पना आनी प्रकल्प विकसीत करपी तरणाट्यांची गरज आसा. गोंयची मुळावी वळख आनी प्रतिमा राखून दवरपाची जबाबदारी आमच्या युवकांची आसा, अशें पर्यटन मंत्री रोहन खंवटे हांणी सांगलें.
पर्यटन खात्यान गोंय विद्यापिठांत आयोजीत युवा टुरिझम क्लबाचे बसकेक हाजीर रावन क्लबाचो भाग आशिल्ल्या विवीध शाळां आनी म्हाविद्यालयांच्या विद्यार्थ्यांकडेन संवाद सादलो.
पर्यटन संचालक सुनील अंचिपाक हांणी भारतीय पर्यटनाच्या मळार युवा राजदूत तयार करप हो युवा टुरिझम क्लबाचो उद्देश आशिल्ल्याचें सांगून तरणाट्यांमदी नवीन कल्पना आनी येवजण्यो निर्माण करपाची भरपूर तांक आसा. पर्यटन वेवसाय हो गोंयचे अर्थवेवस्थेक व्हड सहकार्य करता तशेंच सुमार 35% रोजगार ह्या मळावेल्यान निर्माण जाता, अशें मंत्री रोहन खंवटे हांणी सांगलें.
युवा टुरिझम क्लबाचे वांगडी देशांतलें पर्यटन चालीक लावपाक म्हत्वाचें योगदान दिवपाक शकतात आनी होच उद्देश नदरेमुखार दवरून आझादी का अमृत महोत्सवा निमतान शाळां, म्हाविद्यालयां आनी हेर संस्थांनी युवा टुरिझम क्लबांची स्थापना करपात आयल्या. गोंयांक समृद्ध संस्कृती आनी परंपरेचें दायज लाभिल्ल्यान ताचो प्रचार करपाची गरज आसा. आमकां अध्यात्मीक, भलायकी, कॉर्पोरेट इव्हेंट्स, इको टुरिझमाचेर भर दिवपाची गरज आसा, अशें पर्यटन मंत्र्यान पर्यटन मंत्री रोहन खंवटे हांणी फुडें सांगलें.
बसकेंत ज्ञान प्रसारक विद्यालय, झांट्ये म्हाविद्यालय, जीव्हीएम म्हाविद्यालय, धेंपो म्हाविद्यालयातल्या विद्यार्थ्यांनी मंत्र्यांकडेन संवाद साधलो.
उच्च शिक्षण संचालनालयाचे अतिरीक्त संचालक प्रो. जेर्वासियो मेंडीस, गोंय विद्यापीठाचे डीन विद्यादत्त वेरेंकार, गोंय विद्यापीठाचे सहाय्यक प्राध्यापक डॉ. नितीन सावंत सहाय्यक आनी हेर मानेस्त बसकेक हाजीर आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
