भांगरभूंय | प्रतिनिधी
किदाम्बी श्रीकांतान आपल्या अणभवाचो बरे तरेन उपेग करून आपल्याच देशाच्या लक्ष्य सेनाक सरळ गेमींनी हारोवन इंडोनेशिया ओपन वर्ल्ड टूर सुपर 1000 बॅडमिंटन सर्तीचे क्वॉर्टरफायनलींत सुवात मेळयली. जाल्यार दोन खेपेची ऑलिम्पीक पदक जैतिवंत पी व्ही सिंधू हारली.
दादल्यांच्या एकोड्या गटांतले दुसरे फेरयेंतले मॅचींत लक्ष्य सेनान श्रीकांताक खर आव्हान दिलें. पूण, संवसारीक रॅंकिंगेंतलो आदलो पयल्या क्रमांकाचो खेळगडो श्रीकांतान आपल्या अणभवा नेटार फकत 45 मिनटां मेरेन चलिल्ले मॅचींत 21-17 आनी 22-20 फरकान जैत जोडलें. दोनूय पंगडां मदीं अजून मेरेन फकत तिनूच मॅची जाल्यात आनी तिनूय मॅचींनी श्रीकांतान जैत जोडलां.
मजगतीं, बायलांच्या एकोड्या गटांत संवसारीक क्रमवारींत 14वे सुवातेर आशिल्ले सिंधूक दुसरे फेरयेंत चीनी तायपेचे ताई जू यिंग हिच्या कडल्यान 18-21 आनी 16-21 अशा फरकान हार घेवची पडली.
दुखापती उपरांत पुनरागमन करपी सिंधू फॉर्मांत ना. फाटल्या साबार सर्तींनी खेळटना तिचें आव्हान पयलींच सोंपला. ताई जू यिंगा आड खेळटना सिंधूक खर समस्यांक तोंड दिवचें पडलां. दोनूय खेळगडया मदीं अजून मेरेन 24 मॅची जाल्यात आनी तातूंतल्यो 19 मॅची ताई जू यिंग हिणें जिखल्यात.
सिंधूचे हारीन भारताचें बायलांच्या एकोड्या गटांतलें आव्हान सोंपलें.
दादल्यांच्या एकोड्या गटांत लक्ष्य सेनान सकारात्मक सुरवात केल्ली. ताणें 4-0 अशी आघाडी लेगीत घेतिल्ली. पूण, श्रीकांतान लय मेळयल्या उपरांत मॅचींत पुनरागमन केलें. ते उपरांत दोगूय 17-17 अशे बरोबरीचेर पावले. श्रीकांतान आक्रमक रुप आपणायलें. ताणें सेगीत चार गूण घेत पयली गेम आपल्या नांवार केली. दुसरे गेमींत दोनूय खेळगड्यां मदीं संघर्श पळोवपाक मेळ्ळो. एका वेळार स्कोर 13-13 असो बरोबरीचेर आशिल्लो. श्रीकांतान उपरांत सेगीत स गूण घेवन स्कोर 20-14 अशी केली.
लक्ष्य सेनान लेगीत सहज हार मानूंक ना. ताणें जबरदस्त खेळ करून स्कोर 20-20 असो बरोबरीचेर हाडलो. श्रीकांतान अणभवाचो फायदो घेत सेगीत दोन गूण घेवन मॅच आपल्या नांवार केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
