भांगरभूंय | प्रतिनिधी
अंदूंची आशिया करंड क्रिकेट सर्त श्रीलंका आनी पाकिस्तान ह्या देशांनी जातली. पाकिस्तानांत फकत चारूच मॅची जातल्यो. जाल्यार उरिल्ल्यो 9 मॅची श्रीलंकेंत जातल्यो. अ गटांतली पाकिस्तान आड नेपाळ, ब गटांतली अफगाणिस्तान आड बांगलादेश, अफगाणिस्तान आड श्रीलंका आनी बांगलादेश आड श्रीलंका ह्यो गटांतल्यो फकत ह्यो चार मॅची पाकिस्तानांत जातल्यो.
भारताची एकूय मॅच पाकिस्तानांत जावची ना. फायनल लेगीत श्रीलंकेंत जातली. 31 ऑगस्ट ते 17 सप्टेंबर मेरेन चलपी सर्तींतली खंयची मॅच खंयच्या शारांत जातली हे विशींची अजून कसलीच म्हायती मेळूंक ना.
आशिया करंड सर्तीचो अंदूंचो हंगाम वादांत सांपडिल्लो. सर्तीची येजमानकी पाकिस्तानाक दिल्ली. पूण, एसीसी अध्यक्ष आनी बीसीसीआयचे सचीव जय शाहान पोरूं ऑक्टोबरांत भारताचो पंगड पाकिस्तानांत धाडपाक न्हयकार दिल्लो. ताका लागून वाद उप्राशिल्लो.
ते उपरांत पाकिस्तान सर्तीचें आयोजन हायब्रीड मॉडलान करपाचो प्रस्ताव दिल्लो. हायब्रीड मॉडला प्रमाण भारताच्यो मॅची पाकिस्तान सोडून हेर देशांत आयोजीत करपाक सांगिल्ल्यो. उरिल्ल्यो मॅची पाकिस्तानांत जातल्यो आशिल्ल्यो. भारत फायनलींत पाविल्लो जाल्यार फायनल लेगीत पाकिस्ताना भायर जातली आशिल्ली.
मजगतीं, सर्ती खातीर दोन गट केल्यात. दोनूय गटांतले दरेकी दोन पंगड सुपर चारांत पावतले. सुपर चारांतले पयले दोन पंगड फायनलींत खेळटले.
हे खेपे आशिया करंड सर्त वन डे प्रकारांत खेळयतले. संवसारीक सर्तीचे दिश्टीन आशिया पंगडां खातीर ही सर्त म्हत्वाची आसा. सर्तींत भारता सयत पाकिस्तान, श्रीलंका, बांगलादेश, अफगाणिस्तान आनी नेपाळ हे पंगड वांटो घेतले.
भारतान सात खेपे ही सर्त जिखल्या. 1984, 1988, 1990-91, 1995, 2010, 2016 आनी 2018त वस्तादपण जोडलां. श्रीलंकेन 1986, 1997, 2004, 2008, 2014 आनी 2022त वस्तादपण मेळयलां. पाकिस्तानाक फकत 2000 आनी 2012त किताब जिखपाक येस आयलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
