भुरग्यांच्या येसाचो भोवमान गरजेचो

भांगरभूंय | प्रतिनिधी

गणपतराव राणेः अटल सोशो कल्चरल क्लबान केलो विद्यार्थ्यांचो भोवमान

भांगरभूंय । प्रतिनिधी

वाळपयः आपल्या गांवांतले विद्यार्थी खंयचेय शाळेंत शिकुंदी, तांणी मेळयल्ल्या येसाचो भोवमान जावपाकूच जाय. हो भोवमान ताका सासणाचो उगडासांत उरतलो, अशें राज्य पुरस्कार जैतिवंत शिक्षक गणपतराव राणे हांणी सांगलें. ब्रह्मकरमळे यत्ता धावी आनी बारावेचे परिक्षेंत पास जाल्ल्या विद्यार्थ्यांच्या भोवमान सुवाळ्यांत ते उलयताले.

ही कार्यावळ अटल सोशो कल्चरल क्लबान घडोवन हाडिल्ली. ह्या वेळार क्लबाचे अध्यक्ष गोकुळदास गांवस, राज्य आदर्श शिक्षक पुरस्कार फावो जाल्ली शिक्षिका सरोजनी गांवकार, सचीव सागर प्रभुदेसाय, श्री ब्रह्मदेव देवस्थानाचे आदले अध्यक्ष संदीप केळकार, , रामराव देसाय, सुमित्रा नाडकर्णी, अ‍ॅड. शिवाजी देसाय आनी हेर मानेस्त हाजीर आशिल्ले.

सरोजनी गांवकार हांणी सांगलें, कोरोना काळांत परिक्षा पद्दत सोंपी जाली आनी ताका लागून येस मेळोवपूय सोपें जालें. दरेका विद्यार्थ्यान हें येस अशेंच फुडें तिगोवन दवरप गरजेचें आसा. मुखार एक मोख दवरून काम केलें जाल्यार आमी जिणेंत निश्चीत येसस्वी जावपाक शकतात. सध्याचो काळ स्मार्ट फोनाचो आसा. हे खातीर दरेकल्यान फोनाचो कसो वापर करचो हें थारावपाची गरज आसा. म्हायती आनी तंत्रज्ञानाच्या युगांत आमी आमचे मेहनतीन आमकां सिद्ध करपाक जाय, अशें गांवकार हांणी सांगलें.

जिणेंत बऱ्या मनशांच्या सांगातान रावपाचो यत्न करचो. जे वरवीं आमची जीण सोबीत सुंदर जातली, असो सल्लो गांवकार हांणी विद्यार्थ्यांक दिलो.

ह्या वेळार ब्रह्मकरमळी, शेळप, शिंगणें ह्या गांवांतल्या यत्ता धावी आनी बारावेचे परिक्षेंत विशेश गूण घेतिल्ल्या विद्यार्थ्यांचो भोवमान केलो. नगरगांवचे आदले सरपंच रामराव देसाय, आदली सरपंच सुमित्रा नाडकर्णी, गणपतराव राणे, गोकुळदास गांवस, संदीप केळकार, सागर प्रभुदेसाय हांचे हस्तुकीं विद्यार्थ्यांचो भोवमान केलो.

गणपतराव राणे आनी सरोजनी गांवकार हांचो देवस्थानाचे पुरयत संदीप केळकार हांचे हस्तुकीं शाल आनी नाल्ल दिवन सत्कार केलो. अच्युत परब हांणी प्रास्तावीक केलें. गोकुळदास गांवस हांणी येवकार दिलो. महेंद्र मिलिंद गाडगीळ हांणी वळख करून दिली. प्रवीण परब हांणी सुत्रसंचालन केलें जाल्यार सागर प्रभुदेसाय हांणी उपकार मानले.