भांगरभूंय | प्रतिनिधी
पणजी: लोकराजा राजश्री छत्रपती शाहू महाराज हांच्या स्मृती शताब्दी वर्सा महाराष्ट्रांतले 36 जिल्हे आनी 50 म्हाल तशेंच खुबश्यो शिक्षण संस्था, सामाजीक संस्था, म्हाविद्यालयां, विद्यापीठां हातुंतल्यान शाहू महाराजांचे जिणेचेर सेगीत व्याख्यानां दिल्ले नामनेचे वकील, लेखक तशेंच विचारवंत अॅड. संभाजीराव मोहिते (कर्हाड) हांचीं 17 ते 20 जून मजगतीं गोंयांत व्याख्यानां आयकुपाची संद मेळटली. ते छत्रपती शाहू महाराजांचेर उलयतले. फाटलीं 25 वर्सां तांणी विवीध विशयांचेर देड हजार व्याख्यानां दिल्यां.
तांच्या व्याख्यानाची कार्यावळ कोकण मराठी परिशदेचे सल्लागार तशेंच आदले केंद्रीय कायदोमंत्री अॅड. रमाकांत खलप हांणी जाहीर केल्या.
ता. 17 जुनाक सांजेवेळार 4.30 वरांचेर अॅड संभाजीराव मोहिते हांचें व्याख्यान इन्स्टिट्यूट मिनेझीस ब्रागांझा (आयएमबी) च्या जोड पालवान आयएमबी सभाघर पणजी हांगा जातलें. 18 जुनाक सांजेवेळार 5 वरांचेर रवींद्र भवन वास्कोच्या जोड पालवान रवींद्र भवन, वास्को हांगा जातलें. जाल्यार 20 जुनाक सांजेवेळार 4.30 वरांचेर गोमंतक साहित्य सेवक मंडळ आनी प्रागतीक विचारमंच हांच्या सहयोगान थ्रीफ्ट सभाघर, फोंडें हांगा जातलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
