भांगरभूंय | प्रतिनिधी
इंडोनेशियाच्या जकार्ता शारांत चालू आशिल्ले इंडोनेशिया ओपनाच्या दादल्यांच्या एकोड्या गटांत भारताच्या खेळगड्यांनी आपलो शेक दवरलो. संवसारीक क्रमवारींत 20वे सुवातेर आशिल्लो युवा प्रतिभावंत खेळगडो लक्ष्य सेनान मलेशियाचे ली जी जिया हाका फकत 32 मिनटां भितर 21-17 आनी 21-13 अशा सरळ गेमींनी हारोवन प्री-क्वॉर्टरफायनलींत सुवात मेळयली. सेना खेरीत किदाम्बी श्रीकांत आनी प्रियांशू राजवत हांणी लेगीत प्री-क्वॉर्टरफायनलींतली सुवात निश्चीत केली. लक्ष्य सेन आपली फुडली मॅच भारताच्या किदाम्बी श्रीकांता आड खेळटलो.
ली जी जियान मॅचींत साबार चुकी केल्यो आनी ताचो लक्ष्य सेन योग्य रितीन फायदो करून घेतलो. मजगतीं, श्रीकांतान लेगीत आपली मॅच सहज जिखली. श्रीकांतान चीनाच्या लु गुआन हाच्या आड 21-13 आनी 21-19 अशा फरकान जैत जोडलें.
भारताचो आनीक एक खेळगडो प्रियांशू हाका थायलॅण्डाच्या कुनलावूत वितिदसर्न आड फुडली चाल मेळ्ळी.
बायलांच्या एकोड्या गटांत आकर्षी कश्यपाक हार सोंसची पडली. तिका दक्षीण कोरियाचे एन से यंग हिणें 21-10 आनी 21-4 अशा सरळ गेमींनी हारयली.
मजगतीं, पी व्ही सिंधू, एच एस प्रणय हीं वळेरन बायलांच्या आनी दादल्यांच्या एकोड्या गटांतले आनी चिराग शेट्टी-सात्किकसाईराज रंकीरेड्डी हे जोडयेन हांणी लेगीत फुडले फेरयेंत सुवात मेळयल्या. आयज तीं दुसरे फेरयेंत खेळटलीं.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
