भांगरभूंय | प्रतिनिधी
वाळपयः ब्रह्मकरमळी- सत्तरीचो आनी नगरगांव पंचायत वाठाराक जोडपी नवो सांकव येरादारी खातीर उक्तो केलो. ब्रह्मकरमळी, शेळप, नानेली, शिंगणे ह्या वाठारांत वचपा खातीर हो सांकव म्हत्वाचो आसा.
ह्या सांकवाचे सुवाचेर आशिल्लो आदलो सांकव अशीर आनी मोडपाक पाविल्लो. लोकांचे मागणे वयल्यान नव्या सांकवा खातीर वाळपय भौशीक बांदकाम कार्यालयान सरकाराक प्रस्ताव धाडिल्लो. एप्रीलांत ह्या सांकवाचें काम सुरू जाल्लें. वेलार हो सांकव उक्तो जावंक नाशिल्लो जाल्यार लोकांचे पावसाळ्यांत खूब हाल जावपाचे. सांकवा वांगडाच ह्या वाठारांत राखणे वणत बांदप गरजेचें आसा. पूण हो वावर अजून पुराय जावंक ना. ही राखणे वणत बेगिनात बेगीन बांदली ना जाल्यार लागसाराक आशिल्ल्या शेतां- बागायतींचें लुकसाण जावपाची शक्यताय थळाव्या लोकांनी उक्तायल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
