भांगरभूंय | प्रतिनिधी
सिद्धेश नायकः हळदोण्यां उदरगतीच्या कामांक सुरवात
भांगरभूंय । प्रतिनिधी
म्हापशें: देशाची खरी गिरेस्तकाय गांवगिऱ्या वाठारांनी दिसता. गांवांतली धर्मीक थळां, विवीध संस्थां, साधन सुविधांची मनीसपणाचे नदरेंतल्यान उदरगत करतले, तेन्नाच आमचे गांव सक्षम जातले, अशें उत्तर गोंय जिल्हो पंचायतीचे अध्यक्ष सिद्धेश नायक हांणी सांगलें.
शेनवारा सकाळीं उत्तर गोंय जिल्हो पंचायत निधींतल्यान हळदोणेंच्या श्री सांतेरी भगवती देवस्थानाच्या वाठारांत 10 रुपया खर्च करून पेव्हर्स घालपाच्या कामाक सिद्धेश नायक हांचे हस्तुकीं सुरवात जाली. ह्या वेळार ते उलयताले.
हे कार्यावळीक आदले आमदार ग्लेन टिकलो, जिल्हो पंचायत उपाध्यक्ष दीक्षा कांदोळकार, जिल्हो पंचायत वांगडी मनिषा नायक, सरपंच अश्वीन डिसोझा, नास्नोळेंचे सरपंच फ्रेडी फर्नांडीस, देवस्थानाचे अध्यक्ष प्रणेश नायक, फ्रेन्की कार्व्हालो आनी हेर मानेस्त हाजीर आशिल्ले.
गोंयांत पयलेच खेपे जिल्हो पंचायती वतीन जिल्हो पंचायत आराखडो तयार केला. तातूंत हरीत उर्जा प्रकल्प, हेडग्या गोरवांचेर उपाय येवजण हे सारकिल्ले उपक्रम हातांत घेतल्यात, अशें नायक हांणी सांगलें.
जिल्हो पंचायतीक उण्या प्रमाणांत निधी मेळटा. ताका लागून लोकांचीं जीं कामां प्राधान्यान करप गरजेचीं आसात, तींच हातांत घेतात. समाजांतल्या निमाण्या घटकाक ताचो कसो लाव जातलो हाचो विचार करतात, अशें नायक हांणी सांगलें.
ग्लेन टिकलो हांणी सांगलें, जिल्हो पंचायती वतीन हळदोणें मतदारसंघांत विवीध कामांक मंजुरी दिल्ले खातीर नायक हांचें उपकार. हें काम बरे पद्दतीन आनी नियोजीत वेळांत पुराय करचे, अशी सुचोवणी तांणी केली.
मनिषा नायक हांणीय विचार मांडले. प्रणेश नायक हांणी येवकार दिलो. समीर गडेकार हांणी सुत्रसंचालन केलें जाल्यार व्यंकटेश गावठणकार हांणी उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
