भांगरभूंय | प्रतिनिधी
रमेश तवडकारः नुतनीकरण केल्ले चावडे वयले बागेचें लोकार्पण
भांगरभूंय । प्रतिनिधी
काणकोणः काणकोण म्हाल उदरगतीचे नदरेन गती घेता. वर्सभरांत काणकोणची वीज, उदक आनी रस्तो संबंदीत समस्या सुटाव्यो जातल्यो. कांय जाण गरजे भायर बोवाळ करतात, पूण कोणेच भियेवपाची गरज ना. गावणे धरणाचें उदक लेगीत काणकोणकारांक बेगिनात बेगीन मेळचें, हे खातीर आपले यत्न चालू आसात, अशें काणकोणचे आमदार तशेंच सभापती रमेश तवडकार हांणी सांगलें.
काणकोणां चावडेर आशिल्ले पुर्तुगेज काळांतल्या काणकोण पालिकेचे बागेचें 14 जूनाक लोकार्पण केले उपरांत तवडकार उलयताले. ह्या वेळार नगराध्यक्ष रमाकांत नायक गांवकार, उपनगराध्यक्ष नार्सिस्को फर्नांडीस, नगरसेवक धीरज नायक गांवकार, सायमन रिबेलो, नीतू देसाय, सारा देसाय, अमिता पागी, हेमंत नायक गांवकार, लक्ष्मण पागी, शुभम कोमरपंत, रान खात्याचे वरिश्ठ अधिकारी विशाल सुर्वे, भाजपा मंडळ अध्यक्ष विशाल देसाय, रान अधिकारी सुहास नायक आनी हेर मानेस्त हाजीर आशिल्ले.
चावडे वयले बागेची आवतिकाय जाल्ली. हे आदीं हे बागेचें राजबागांतल्या द ललीत रिसोर्टा वतीन नुतनीकरण केल्लें. पूण उपरांत देखरेख नाशिल्ल्यान बागेची आवतिकाय जाल्ली. ताका लागून नगराध्यक्ष नायक गांवकार हांणी राम खात्याच्या समाजीक वनीकरण विभागाचे वरिश्ठ अधिकारी विशाल सुर्वे हांचे कडेन बागेचें नुतनीकरण करपाचो प्रस्ताव मांडिल्लो. तांणी हो प्रस्ताव मान्य करून सुमार 7 लाख रुपया खर्च करून बागेचें नुतनीकरण केलें.
काणकोणचे उदरगती खातीर सभापती तवडकार हांणी गंभीरतायेन पावलां उखल्ल्यांत. चाररस्तो ते पुलीस स्टेशना मेरेनच्या वाठाराचें सोबितीकरण करतले. आमदारान हे बाबतींत आदार करचो, अशी मागणी नगराध्यक्ष नायक गांवकार हांणी केली.
ह्या वेळार आदले उपनगराध्यक्ष दिलीप केंकरे हांणीय आपले विचार मांडले.
बागेच्या नुतनीकरणा खातीर रान अधिकारी सुहास नायक आनी संतोष वेळीप हांणी दिल्ल्या योगदाना खातीर सुर्वे हांणी तांकां परबीं दिली. येसो देसाय हांणी सुत्रसंचालन केलें, प्रेसी फर्नांडीस हांणी येवकार दिलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
