भांगरभूंय | प्रतिनिधी
मनोजकुमार सिंह राठोड: वाळपय हनुमान विद्यालयांत एनसीसी कार्यरत
वाळपय: एनसीसींत वांटो घेवप्यांक सैन्यांत भरती जावपाक कसलेच तरेचें बंधन नासता. देखून राष्ट्राचो एकवट तिगोवन दवरपा खातीर एनसीसी म्हत्वाचें आशिल्ल्याचें मत कोलोनेल बटालीयन, कमांडो अधिकारी गोंय एकचे मनोजकुमार सिंग राठोड हांणी उक्तायलें. वेळूस वाळपयच्या श्री हनुमान विद्यालयांत आयोजीत एनएसीसीच्या पयल्या गटाच्या उक्तावण कार्यावळीक ते मुखेल सोयरे ह्या नात्यान उलयताले.
ह्या वेळार माचयेर सुभेदार मनोज नरेंद्र दत्त, नायब सुभेदार बहादुर गुरुंग, हवालदार जहागीर बिस्वा, वाळपय शिक्षण संस्थेचे अध्यक्ष नरहरी हळदणकार, मुख्याध्यापिका सुविधा बर्वे, संस्थेचे खजिनदार प्रशांत सोलापुरकार, शिक्षक विश्वास कंवळेंकार, शारिरीक शिक्षक विजयकुमार पाटील, एनसीसी शिक्षक पांडुरंग गांवकार आनी हेर हाजीर आशिल्ले.
तरणाट्यां मदीं देशभक्तीची भावना निर्माण करप हो एनसीसीचो मुखेल हेत आनी मुखेल विधान म्हणल्यार एकवट आनी शिस्त. तरणाट्यां मदीं शिस्त, चरीत्र, भावपण सारके सद्गुण रुजोवप हें एनसीसीचें ध्येय. हाचे वयल्यान एनसीसीचें मोल दिसून येता. एनसीसींत येवपी तरणाट्यांक तांची योग्यताय दाखोवपा खातीर प्रमाणपत्रां दितात. त्या तरणाट्यांनी फुडें सैन्यांत येवचें काय ना हो तांचो स्वताचो निर्णय जावन आसा.
एनसीसी म्हळ्यार राष्ट्रीय कॅडेट कॉर्प्स. ही भारतांतील युवा लश्करी संघटणां मदली एक जावन आसा. तरणाट्यां मदीं सैन्याविशीं जागृताय निर्माण जावची आनी तांकां लष्करी पांवड्यार तयार जावचे खातीर एनसीसीची स्थापना केली. एनसीसीचें मुख्यालय दिल्लींत आसा. एनसीसी भारताच्या तिनूय सैन्यदळ, नौदळ, लश्कर आनी हवाई दळा कडेन संबंदीत आसा.
दिवली पेटोवन कार्यावळ सुरू जाली. मानेस्तांक फुलांचो तुरो भेटोवन येवकार दिलो. तशेंच मानेस्तांक भेटवस्त भेटोवन भोवमान केलो. ह्या वेळार हाजीर आशिल्ल्या मानेस्तां हस्तुकीं फाटल्या वर्सा विद्यालयांत आयोजीत केल्ल्या वर्ग नितळ करपाचे सर्तीचीं इनामां भेटयलीं. तातूंत नितळ आनी सोबीत वर्ग म्हणून यत्ता धावी आनी यत्ता 5 वी अ वर्गाक ट्रॉफी भेटयली. हाची ट्रॉफी प्रशीला शिरोडकार हांणी आपली आवय स. शकुंतला डांगी हांच्या उगडासान प्रस्तूत केल्यात.
ह्या वेळार एनसीसीच्या पयल्या भागांत वट्ट यत्ता 8 वेच्या 25 विद्यार्थ्यांचो आसपाव आसा. ह्या वेळार मानेस्तांनी सगळ्या भुरग्यांक परबीं भेटयलीं. कार्यावळीक येवकार मुख्याध्यापिका सुविधा बर्वे, सुत्रसंचालन दिप्ती, प्रशिला शिरोडकार, जाल्यार उपकार पांडुरंग गांवकार हांणी मानले. ह्या वेळार एनपी संगीता ठाकूर हांणी नव्या शिक्षणीक धोरणा विशीं म्हायती दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
