भांगरभूंय | प्रतिनिधी
भांगरभूंय । प्रतिनिधी
पर्वरीः थॉमस स्टीफन्स कोंकणी केंद्रान पयलो कोंकणी सिनेमा ‘आमचें नोशीब’ हाचो हिरक महोत्सव मनोवपाचें थारायलां. व्हो सिनेमा 1963 वर्सा प्रदर्शीत केल्लो.
गोंय मुक्ती उपरांत कोंकणींतलो व्हो पयलो सिनेमा फ्रन्क फर्नांड हाणे तयार केल्लो आनी ए सलाम हाणे ताचेंंदिग्दर्शन केल्लें अशी म्हायती केंद्राचो संचालक डॉ पांडुरंग फळदेसाय हाणे एके पत्रकार परिशदेंत दिली. ह्या सिनेमांत तेन्नाचे कलाकार, सी आल्वारीस, रिटा लोबो, ऑफिलिया, एम बॉयर, कीड बॉक्सर, सौझा फॅर्रांव, आन्तोनेत मेंडीस, आल्फ्रेड रोझ, रेमी कुलसो, क्रायरिको डायस, मास्टर वाझ, फिलोमिना ब्राझ, रिको रॉड, तिता प्रितो, लीना वाझ हांणी काम केल्ले.
ह्या सिनेमांत काम केल्ले चडशे कलाकार सध्या जितें नात. क्रायरिको डायस हांचो नामनेचे तियात्रिस्त आनी आदले सभापती तोमाझीन कार्दोज हांचे हस्तुकीं भोवमान करतले अशी म्हायती फळदेसाय हाणे दिली. ही कार्यावळ बिरेस्तार 15 जूनाक दनपारां 3.30 वरांचेर थॉमस स्टिफन्स कोंकणी केंद्राच्या सभाघऱांत जातली. डॉ मिनाक्षा मार्टिन्स, राजेंद्र तलाक, मायकल ग्रासियश, आयरीन कार्दोझ आनी डॉ नंदकुमार कामत आमचें नोशीबा विशीं उलयतले. कार्यावळींत सिनेमांतली कांय पदां दाखयले.
कोंकणी सिनेमा मळार आमचें नोशीब सिनेमा एक ट्रॅन्ड सेटर आशिल्लो. सिनेमाचो निर्मातो फ्रन्क फर्नांड हाणेच ह्या सिनेमाक संगीत दिल्लें आनी सगली पदां सामकी फामाद जाल्लीं अशें केंद्राचो संजोयक फादर जुशे सिल्वेरा हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
