भांगरभूंय | प्रतिनिधी
भांगरभूंय । प्रतिनिधी
काणकोणः गोवा रिव्होल्युशनरी पक्षाचे (आरजी) सान्तआंद्रेचो आमदार विरेश बोरकार हाणे हालींच काणकोणांतल्या वेगवेगळ्या वाठारांतल्या लोकांका मेळून तांच्यो समस्या समजून घेतल्यो. 2024चे लोकसभा वेंचणुकेंत आरजीचो उमेदवार आसतलो काय किदें अशें पत्रकारांनी विचारलें तेन्ना आमी ही वेंचणूक लडयतले अशें तांणे सांगलें मात उमेदवार कोण आसतलो हें मात उक्तें केलें ना.
पुराय काणकोण तालुक्यांत पियेवपाच्या उदकाचो प्रश्न लोकांक भेश्टायता. गावणे हांका धरण बादून जालां मात लोकांक ह्या धऱणांतल्या उदकाचो वापर करपाक मेळना हे खातीर बोरकारान नाराजी उक्तायली. श्रीस्थळ हांगचे उद्देगीक वसणुकेंत सुरू आशिल्ल्या कावल्याच्या अड्याची ताणे पळोवणी केली. ह्या अड्ड्या शेजरा सोऱ्याची फॅक्टीर आशिल्ल्यान अड्यांत पोरणे गॅस सिलिंडर कावलांत काडपाचें जें काम चल्लां तातूंत संबंदीत सरकारी यंत्रणेन लक्ष घालपाची गरज आसा अशें प्रशांत पागीन ह्या वेळार सांगलें.
विरेश बोरकारन गावणे धरण, इंद्रावाडा हांगोच खेळा संघ आनी काणकोणच्या वेगेवेगळ्या वाठारांतल्या लोकांच्यो भेटी घेवन सरकारी प्रशासना विशीं तांचे कडेन उलोवणी केली. ताच्या वांगडा दिनेश भगत, जिवेश पागी,नीलेश भंडारी, गौरांग कामत, मनोज पागी आनी हेर वावुरपी आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
