भांगरभूंय | प्रतिनिधी
बेतकेकार: श्री कमलेश्वर उच्च माध्यमीक विद्यालयांत ‘राष्ट्रीय शिक्षणीक धोरण’चेर व्याख्यान
पेडणें: राष्ट्रीय शिक्षणीक धोरणांत विद्यार्थ्यां मदीं स्वाभिमान आनी आत्मविश्वास निर्माण करपाची तांक आशिल्ल्याचें प्राचार्य दिलीप बेतकेकार हांणी सांगलें.
कोरगांवच्या श्री कमलेश्वर उच्च माध्यमीक विद्यालयांत जी – 20 जनभागीदारी उपक्रमा खाला ‘राष्ट्रीय शिक्षणीक धोरण’ ह्या विशयाचेर आयोजीत केल्ल्या व्याख्यानांत ते उलयताले.
ह्या वेळार माचयेर श्रीकमलेश्वर शिक्षण प्रसारक संस्थेचे अध्यक्ष अॅड. शाम शेटये, सचीव निळकंठ थळी, श्रीकमलेश्वर उच्चमाध्यमीक विद्यालयाची प्राचार्य जुही थळी, श्री कमलेश्वर हायस्कूल देवुळवाड्यावेले मुख्याध्यापक भालचंद्र हिरोजी, पेठेचोवाडो हायस्कूल मुख्याध्यापक आत्माजी नायक आनी हेर मानेस्त हाजीर आशिल्ले.
ह्या वेळार प्रा. बेतकेकार हांणी ‘राष्ट्रीय शिक्षणीक धोरणा’चेर उलयतना सांगलें, विद्यार्थ्यांच्या आवडी प्रमाण शिक्षण घेवपाची संद ह्या धोरणांत मेळटा. ताका लागून विद्यार्थ्यांची कुशळटाय जाणून घेवन ते प्रमाण शिक्षण दिवपाची तजवीज शिक्षणांत केल्या. विध्यार्थ्यांचे सृजनशिलतायेक उर्बा दिल्या. ताची अंमलबजावणी प्रभावीपणान जाल्यार शिक्षणीक गुणेस्तकाय निश्चीतूच वाडटली अशें तांणी म्हणलें.
श्री कमळेश्वर शिक्षण प्रसारक संस्थेचे अध्यक्ष अॅड. शाम शेट्ये हांणी, नव्या शिक्षणीक धोरणाची अंमलबजावणी जाल्ल्यान देशांत शिक्षणीक पांवड्यार म्हत्वाचे बदल करप शक्य जालां. ताका लागून विध्यार्थी, शिक्षक आनी पालकांनी खोलायेन विचार करचो, अशें तांणी सांगलें.
सुरवातेक जुही थळी, भालचंद्र हिरोजी, सोनू वस्त हांणी मानेस्तांक फुलांचे तुरे भेटयले.
मुख्याध्यापक भालचंद्र हिरोजी हांणी प्रास्तावीक केलें. विठोबा बगळी येवकार दिलो आनी प्राचार्य जुही थळी हांणी उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
