भांगरभूंय | प्रतिनिधी
मंत्री गोवींद गावडे: वेळींग-प्रियोळा बायो गॅस प्रकल्पाचें लोकार्पण
फोंडें: सैमान नटिल्लो प्रियोळ मतदार संघ नितळ दवरपाचो यत्न दरेकल्यान करपाक जाय. ह्यान फुडें घरांतलो कोयर रस्त्याच्या कुशीक उडयतना कोणूय दिसल्यार ताचेर खर कारवाय करतले, अशें कला आनी संस्कृती मंत्री गोवींद गावडे हांणी सांगलें.
वेळींग-प्रियोळ पंचायती वतीन उबारिल्ल्या बायो गॅस प्रकल्पाच्या लोकार्पण कार्यावळीक मंत्री गोवींद गावडे उलयताले. ह्या वेळार सरपंच हर्षा गावडे, पंचायत खात्याचे उपसंचालक प्रसिद्ध नायक, गट विकास अधिकारी आश्विन देसाय, उपसरपंच रुपेश नायक आनी हेर मानेस्त हाजीर आशिल्ले.
कोयराचो विलो लावपा खातीर सरकार कोयर प्रकल्प उभारून दिता. पूण ह्या प्रकल्पाची जतनाय कोण घेनात. ह्या प्रकल्पांचो वापर करचो आनी ताची जतनाय दरेकल्या नागरिकान घेवन सरकाराक सहकार्य करचें, अशें मंत्री गोवींद गावडे हांणी सांगलें.
ह्या मतदारसंघांतल्या कांय वाठारांतले शिक्षीत लोक अशिक्षीत आशिल्ले वरीं घरांतलो कोयर हाडून रस्त्याचे कुशीक उडयतना दिसतात. कोयराचो प्रस्न खर जायत चल्ला. हें लक्षांत घेवन दरेकल्यान जागृत रावन कोयराचो प्रस्न सोडोवपा खातीर यत्न करचे, अशें मंत्री गावडे हांणी फुडें म्हणलें.
नितळ भारत मोहीम येसस्वी करपा खातीर दरेका नागरिकाचें योगदान म्हत्वाचें. दरेक गांव आनी पंचायत वाठार नितळ दवरपा खातीर सरकार सहकार्य करतलें. पूण नितळसाण दवरपाची जापसालदारकी दरेकल्या नागरिकाची आशिल्ल्याचें उपसंचालक प्रसिद्ध नायक हांणी सांगलें.
ह्या वेळार गट विकास अधिकारी आश्वीन देसाय हांणी आपले विचार मांडले. सरपंच हर्षा गावडे हांणी येवकार दिलो. उपसरपंच रुपेश नायक हांणी सगळ्यांचे उपकार मानले. कार्यावळीचें सुत्रसंचालन पंचायतीचे सचीव सुशांत नायक हांणी केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
