भांगरभूंय | प्रतिनिधी
आमदाराचें आव्हानूय स्विकारलें, शेतांय पिकयलीं, खोस मनयली
भांगरभूंय । प्रतिनिधी
सांगें: सांग्यार नियोजीत आयआयटी प्रकल्पाक थळाव्या शेतकारांनी खर विरोध केल्लो. केंद्र सरकारान लेगीत दोंगर कांपून, सैम पेड्डेर करून आयआयटी प्रकल्प जावचो ना अशें सांगून प्रकल्प रद्द केला. केंद्र सरकाराचें उपकार मानून शेतकारांनी परतून एकदां आपापले जमनींत शेत रोयलें. थळाव्या आमदारान तांकां थंय शेत रोवन कणसां काडून दाखोवपाचें आव्हान दिल्लें. शेतकारांनी ह्या आव्हानाक जाप दितना ते जमनींत शेत रोवन पीक काडलें आनी त्याच पिकाचें थंय जेवण रांदून उमेदीन वनभोजन केलें.
सांग्यार आयआयटी प्रकल्पाच्या मुद्द्याचेर थळावे शेतकार आनी थळावो आमदार (सरकार) हांचे मदीं बरेंच पेटिल्लें. 200 ते 300 पुलिसांच्या पंगडाच्या आदारान जमनीचें सर्व्हेक्षण केल्लें.
आयआयटी प्रकप्ल तेच सुवातेचेर जातलो. ती पडीक जमीन चडांत चड सरकाराची आसा. थंय कोणूच शेत रोयना. ते खातीर थंय आयआयटी जावप गरजेचें आसा. जे वरवीं लोकांक रोजगार मेळटलो आ सांगें मतदारसंघाची उदरगत जातली, ह्या मुद्द्याचेर थळावो आमदार घट राविल्लो. ताका मुख्यमंत्री डॉ. प्रमोद सावंत हांचो तेंको आशिल्लो.
दुसरे वटेन आमी दोंगर कांपून शेतां काबार करून सैमाचो उबाड क रून आयआयटी प्रकल्प हाडूंक दिवचे नात, असो हट्ट थळाव्या लोकांनी धरिल्लो. शेतकार सांगताले ते 200 परस अदीक शेतकार आसात. कांय कारणांक लागून कांय लोकांनी कांय काळ शेत रोयलें ना. पूण खूबशे लोक काजू, माड, माडयो, ऊस आनी हेर पिकावळ रोयतात. शेतकारांनी हे विशींची म्हायती केंद्र सरकाराक कळयिल्ली.
वनभोजना वेळार हाजीर आशिल्ले समाज वावुरपी मिल्टन फर्नांडीस हांणी सांगलें, आमी आमच्या हक्का खातीर झगडले, सैमाची राखण करपाक झगडले. थळाव्या आमदारान आमकां खूब अन्याय केलो. 144 कलम लावन आमकां सतायले, पूण आमी भियेवंक नात. मेजक्याच लोकांक घेवन आंदोलनां केलीं. अखेर केंद्र सरकारान सैमाचो विचार करून हो प्रकल्प रद्द केलो.
मारिया क्रूज हांणी सांगलें, सत्या खातीर झगडटना आमी खूब त्रास सोंसले, पूण त्या त्रासाचें फळ आमकां मेळ्ळें. जे तरेन आमकां कणसां दाखोवपाचें आव्हान दिल्लें ताका जाब म्हूण कणसां पिकोवन त्याच कणसांचें जेवण रांदलें. केंद्र सरकार शेतकार तशेंच सैम मोग्यां वांगडा रावले हेच खातीर आमचें जैत जालें, अशें तांणी सांगलें.
सांतान रॉड्रिगीज हांणी सांगलें, आयआयटी प्रकल्पाक धांवडावन घालपा खातीर जेन्ना आमी शेतकारांक उलो मारलो तेन्ना सगळ्यांनी तेंको दिलो. आयआयटी प्रकल्पा आड आमी शांततायेन झगडले. ह्या आंदोलनांत आमकां पुलिसांच्या आदारान त्रास दिलो, मारपेट केलो, पूण शेतकारांनी शेतां आनी सैम राखपा खातीर सगळें सोंसलें. हेच खातीर आमचें जैत जालें. जाहीर बसके वेळार त्या लोकांनी सभाघरांत येवन बसका उद्ध्वस्त केली. आमचेर आनी आमच्या गाडयांचेर हल्लो केलो, पूण आमी सत्या वांगडा रावले. हेच खातीर जैत जालें, अशें कोस्तावसियो मास्कारेन्हस हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
