भांगरभूंय | प्रतिनिधी
रमेश तवडकारः काणकोण मतदारसंघा खातीर वीज खात्या वतीन 300 कोटी रुपया मंजूर
भांगरभूंय । प्रतिनिधी
काणकोणः काणकोणां श्रमधामाचीं घरां बांदल्यांत. हे मुखार केपें, सांगें ह्या मतदारसंघांतूय अशे तरेचीं 100 घरां बांदपाचो विचार आसा, अशें काणकोणचे आमदार, बलराम चेरिटेबल फावंडेशनचे अध्यक्ष तशेंच सभापती रमेश तवडकार हांणी सांगलें.
श्रीस्थळ घेतिल्ले पत्रकार परिशदेंत सभापती तवडकार उलयताले. ह्या वेळार काणकोण भाजपा मंडळाचे अध्यक्ष विशाल देसाय, सचीव दिवाकर पागी, सरपंच आनंदु देसाय, प्रितल फर्नांडीस, सेजल गांवकार, पैंगीणचे उपसरपंच सुनील पैंगीणकार, विनय तुबकी, सिद्धार्थ देसाय, संतोष लोलयेंकार, नागेश कोमरपंत, आदली सरपंच फातिमा रॉड्रिगीज, महेश नायक आनी हेर कार्यकर्ते हाजीर आशिल्ले.
15 मार्चाक मुख्यमंत्री डॉ. सावंत हांचे हस्तुकीं श्रमधाम संकल्पनेची सुरवात केल्ली. आतां मेरेन 20 घरांचें काम हातांत घेतलां. हीं घरां बांदपाक दरेकी सुमार 10 लाख रुपया खर्च आयला, अशें तवडकार हांणी सांगलें.
वीज खात्यान काणकोण मतदारसंघां खातीर 300 कोटी रुपयांचो निधी मंजूर केला. आतां मेरेन 161 कोटी रुपयांचीं कामां हातांत घेतल्यात, काणकोण पालिका वाठारांतले सगळे लोखणाचे लायटीचे खांबे बदलतले. मुख्य वीज सरयो बदतले. बेंदोडे ते करमल घाट मेरेनच्या वीज सरयांचेर सुमार 44 कोटी रुपया खर्च येतलो. सगळ्या कामांक मंजुरी मेळ्ळ्या. दर्यादेग वाठारांत आतां मेरेन 16 कोटी रुपयांचीं कामां पुराय जाल्यांत. एलटी केबल, ओव्हर हेड केबल बदलपाचें काम सुरू आसा, अशी म्हायती तवडकार हांणी दिली.
पोळें तपासणी नाक्या लागसार साडेतीन कोटी रुपया खर्च करून सोबीत प्रवेशदार आनी विसव घर बांदतले. गोंय पर्यटन विकास मंडळा वतीन हें काम हातांत घेतले. विवीध खात्यांनी सरकारी कर्मचारी काम करतात तांचे खातीर शौचालय, प्रसाधन घराची थंय वेवस्था आसतली. ते भायर हेर राज्यांतल्यान गोंयांत प्रवेश करपी प्रवाशां खातीर येवकार विभाग बांदतले. ह्या कामाक रोखडीच प्रत्यक्ष सुरवात करतले, अशें तवडकार हांणी सांगलें. लोलयें पंचायत वाठारांतल्या म्हशीफोंड वाठारांतले तळयेचें सोबितीकरण गोंय पर्यटन उदरगत करतनाच गोंय म्हामंडळा वतीन 18 कोटी रुपया खर्च करून लोकां खातीर जॉगींग ट्रॅक, तशेंच हेर सुविधा निर्माण करतले. पैंगीणच्या पोटके मैदानार 2 कोटी 70 लाख रुपया खर्च करून ह्या मैदानाचें पयल्या पांवड्या वयलें काम पुराय करतले, अशीय म्हायती सभापती तवडकार हांणी दिली.
श्रमधामाचीं घरां बुधवारा भेटयतलेः सभापती
काणकोणां बांदिल्ल्या श्रमधामाच्या घरांच्यो चावयो दिवपाची कार्यावळ 15 जूनाक सांजेच्या 4 वरांचेर जातली. काणकोणच्या उच्च माध्यमीक सभाघरांत अर्धफोंड वाठारांतल्या हरिश्चंद्र नायक हांकां घराची चावी दिवन श्रमधामाच्या घरांचें प्रातिनिधीक स्वरुपांत उक्तावण जातलें. हे कार्यावळीक लोकसभेचे सभापती ओम बिर्ला, मुख्यमंत्री डॉ. प्रमोद सावंत, भाजपाचे केंद्रीय सचीव बी. सतीश, मंत्री, आमदार हाजीर रावतले. तशेंच हीं घरां आनी ह्या घरां संबंदीत व्यक्तींचेर बरयिल्ल्या पुस्तकाचें लोकार्पण तशेंच चित्रफितीचें उक्तावण करतले, अशीय म्हायती सभापती रमेश तवडकार हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
