भांगरभूंय | प्रतिनिधी
आरजीचो लोकांचो तेंको; प्रकल्प बेकायदो आशिल्ल्याचो दावो
भांगरभूंय । प्रतिनिधी
शिवोलीः कामुर्लेच्या गृहनिर्माण प्रकल्पाक थळाव्या लोकांनी खर विरोध केला. हो प्रकल्प खंयचेच स्थितींत जावपाक दिवचे नात, असो निश्चेव थळाव्या लोकांनी केला. ताका रिव्होल्युशनरी गोवन्स (आरजी) पक्षान तेंको दिला.
आयतारा सांजे वेळार आरजीचे मनोज परब हांणी थळाव्या लोकां सयत कामुर्ली वाठाराक भेट दिली. ह्या वेळार पत्रकारां कडेन उलयतना परब हांणी सांगलें, कामुर्ले दोंगरमाथ्यार 56 हजार चौखण मिटर सुवातेंत गृहनिर्माण प्रकल्प उबो जाता. ह्या प्रकल्पाच्या कामाक सुरवात जाल्या. दोंगरमाथ्यार उदका खातीर बोरवॅल मारपाचें काम चालू जालां. हे बोरवॅलीक लागून गांवांतल्या उदका स्त्रोतांचेर परिणाम जातलो.
ह्या प्रकल्पा आड हे आदींच कागाळ दिल्या. हो विशय ग्रामसभेंतूय मांडटले. ह्या प्रकल्पाक दिल्ली मान्यताय पंचायतीन फाटीं घेवची, अशी मागणी ग्रामसभेंत करतले. नगरनियोजन खात्या कडेन कागाळ करून लेगीत अजून खात्याच्या अधिकाऱ्यांनी पळोवणी करूंक ना. ह्या प्रकल्पांत कोट्यांनी रुपयांचे बंगले बांदतले. ते विकत घेवपाची आस्पत थळाव्या लोकांची ना. स मिटर रस्तो नासतना ह्या प्रकल्पाक मान्यताय दिवपाकूच शकनात. ह्या वाठारांतले रस्ते अशे तशे अडेज ते तीन मिटर रूंद आसात. अशे अवस्थेंत तो प्रकल्प पुराय बेकायदो आसा, असो दावो परब हांणी केलो.
कामुर्लीचे आदले सरपंच शरद गाड हांणी ह्या प्रकल्पाक खर विरोध केला. तांणी सांगलें, हो प्रकल्प पुराय बेकायदो आसा. ह्या प्रकल्पाक लागून थळाव्या लोकांचें अस्तित्व धोक्यांत येतलें. ह्या दोंगरा खाला कितलीशींच घरां आसात. वयली सगळी घाण लोकांच्या घरां मेरेन येतली. वयर देवाचो वर्सुकी उत्सव मनयतात, ताकाय आडखळ येतली, अशें गाड हांणी सांगलें. ह्या वेळार थळावे लोक व्हड संख्येन हाजीर आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
