भांगरभूंय | प्रतिनिधी
काणकोणः परतून परतून बंद जावपी वीज पुरवण आनी ती परतून सुरू जावपाक वराचीं वरां वतात, हाका लागून काँग्रेस पक्षाच्या फुडाऱ्यांनी तशेंच गोंयकार हे बिगर सरकारी संघटणेच्या कार्यकर्त्यांनी काणकोणचे वीज अभियंते गोविंद भट हांकां घेराव घातलो.
कुंकळी आनी शेल्डेंच्यान वीज पुरवणें बिघाड जालो जाल्यार काणकोणांतली वीज पुरवण बंद जाता, अशें भट हांणी ह्या वेळार सांगलें. काणकोणकारांक बऱ्यांतली बरी वीज सेवा दिवपाक आपूण सदांच तयार आसता, अशेंय तांणी सांगलें.
मात आंदोलन करपी जनार्दन भंडारी, विकास भगत, जॅक फर्नांडीस हांणी पांच दिसां भितर वीज पुरवणेंत सुदारणा जाली ना जाल्यार खर आंदोलन करपाची शिटकावणी ह्या वेळार दिली. ह्या वेळार वैष्णव पेडणेंकार, गास्पार कुतिन्हो, क्लेस्टन व्हिएगस, वैशाल पागी, सिद्धार्थ गायक, सोको फर्नांडीस आनी हेर कार्यकर्ते हाजीर आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
